'എത്ര യാത്രകൾ വേണമെങ്കിലും നടത്താം...': ബിഹാറിലെ അർവാളിൽ രാഹുൽ ഗാന്ധിയെ 'ഇറ്റലി' എന്ന് പരിഹസിച്ച് അമിത് ഷാ

പട്‌ന: കോണ്‍ഗ്രസ് എംപി രാഹുല്‍ ഗാന്ധിയുടെ 'വോട്ട് ചോറി' ആരോപണങ്ങളെയും 'വോട്ടര്‍ അധികാര് യാത്ര'യെയും കേന്ദ്ര ആഭ്യന്തര മന്ത്രി അമിത് ഷാ ഞായറാഴ്ച രൂക്ഷമായി വിമര്‍ശിച്ചു. 

ബീഹാറിലെ നുഴഞ്ഞുകയറ്റക്കാരെ രക്ഷിക്കാനുള്ള ശ്രമമാണ് രാഹുല്‍ ഗാന്ധിയുടെ മാര്‍ച്ച് എന്ന് അദ്ദേഹം പറഞ്ഞു. രാഹുല്‍ ഗാന്ധിക്ക് പട്‌നയില്‍ നിന്ന് ഇറ്റലിയിലേക്ക് യാത്രകള്‍ നടത്താന്‍ കഴിയും, എന്നാല്‍ ബിജെപി രാജ്യത്തുനിന്നും ബീഹാറില്‍ നിന്നും എല്ലാ നുഴഞ്ഞുകയറ്റക്കാരെയും പുറത്താക്കുമെന്ന് അര്‍വാളില്‍ നടന്ന ഒരു വോട്ടെടുപ്പ് റാലിയെ അഭിസംബോധന ചെയ്തുകൊണ്ട് അമിത്ഷാ പറഞ്ഞു. 

'കുറച്ചുനാള്‍ മുമ്പ് രാഹുല്‍ ഗാന്ധി ഒരു വലിയ യാത്ര ആരംഭിച്ചു... നുഴഞ്ഞുകയറ്റക്കാരെ രക്ഷിക്കാനായിരുന്നു ഈ യാത്ര... രാഹുല്‍ ഗാന്ധിക്ക് പട്‌ന മുതല്‍ ഇറ്റലി വരെ എത്ര യാത്രകള്‍ വേണമെങ്കിലും നടത്താം, പക്ഷേ നുഴഞ്ഞുകയറ്റക്കാരെ രക്ഷിക്കാന്‍ അദ്ദേഹത്തിന് കഴിയില്ല,' ഷാ പറഞ്ഞു.

'ബീഹാറിലെ യുവാക്കളെക്കാള്‍ ബംഗ്ലാദേശില്‍ നിന്നുള്ള നുഴഞ്ഞുകയറ്റക്കാരുടെ കാര്യത്തിലാണ് അദ്ദേഹത്തിന് കൂടുതല്‍ ആശങ്ക.'

ലോക്സഭയിലെ പ്രതിപക്ഷ നേതാവിന്റെ 'വോട്ട് ചോറി' ആരോപണങ്ങളെ വിമര്‍ശിച്ച മുതിര്‍ന്ന ബിജെപി നേതാവ്, രാഹുല്‍ ഗാന്ധി എന്തുകൊണ്ട് ഇന്ത്യന്‍ തിരഞ്ഞെടുപ്പ് കമ്മീഷന് ഔദ്യോഗികമായി പരാതി നല്‍കിയില്ല എന്നും ചോദിച്ചു. 'ഇറ്റലി വരെ ഞെട്ടല്‍ തരംഗങ്ങള്‍ അയയ്ക്കുന്ന തരത്തില്‍ എന്‍ഡിഎ സ്ഥാനാര്‍ത്ഥികള്‍ക്ക് അനുകൂലമായി ഇവിഎം ബട്ടണ്‍ അമര്‍ത്തുക,' അമിത്ഷാ പറഞ്ഞു. 

പാകിസ്ഥാനെതിരെ നടപടിയെടുക്കാത്തതിന് കോണ്‍ഗ്രസിനെ ഷാ വിമര്‍ശിച്ചു. മുന്‍ പ്രധാനമന്ത്രി മന്‍മോഹന്‍ സിങ്ങും സോണിയ ഗാന്ധിയും കേന്ദ്രത്തില്‍ അധികാരത്തിലിരുന്നപ്പോള്‍ തീവ്രവാദികള്‍ ഇന്ത്യയില്‍ പതിവായി ഭീകരാക്രമണങ്ങള്‍ നടത്തിയിരുന്നുവെന്നും അദ്ദേഹം പറഞ്ഞു.

എന്നാല്‍, പ്രധാനമന്ത്രി നരേന്ദ്ര മോദിയുടെ നേതൃത്വത്തില്‍ തീവ്രവാദികള്‍ക്ക് ഉചിതമായ മറുപടി നല്‍കുന്നുണ്ടെന്നും അദ്ദേഹം പറഞ്ഞു.