രാഹുല്‍ വിമാനം 20 തവണ തകര്‍ന്നു, 21-ാം തവണയും തകരും. രാഹുലിന്റെ നാലാം തലമുറയ്ക്കും ആര്‍ട്ടിക്കിള്‍ 370 തിരികെ കൊണ്ടുവരാനാകില്ല-അമിത് ഷാ

മുംബൈ: ഇതിനകം 20 തവണ തകർന്ന ‘രാഹുൽ ബാബ’ എന്ന വിമാനം നവംബർ 20ന് നടക്കുന്ന മഹാരാഷ്ട്ര നിയമസഭാ തിരഞ്ഞെടുപ്പിൽ വീണ്ടും അപകടത്തിൽപ്പെടുമെന്ന് കേന്ദ്ര ആഭ്യന്തര മന്ത്രി അമിത് ഷാ.

“രാഹുൽ ബാബ എന്ന് പേരിട്ടിരിക്കുന്ന വിമാനം ഇറക്കാൻ സോണിയ ജീ 20 തവണ ശ്രമിച്ചു. 20 തവണ വിമാനം തകർന്നു. ഇപ്പോഴിതാ വീണ്ടും മഹാരാഷ്ട്രയിൽ 21-ാം തവണ വിമാനം ഇറക്കാനുള്ള ശ്രമമാണ് നടക്കുന്നത്. സോണിയാ ജീ, നിങ്ങളുടെ 'രാഹുൽ വിമാനം' 21-ാം തവണയും തകരാൻ പോകുകയാണ്"-അമിത് ഷാ പറഞ്ഞു.

പർഭാനി ജില്ലയിലെ ജിന്തൂരിൽ നടന്ന റാലിയെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. വർഷങ്ങളായി അയോധ്യയിൽ രാമക്ഷേത്ര നിർമാണം കോൺഗ്രസ് ബോധപൂർവം സ്തംഭിപ്പിക്കുകയായിരുന്നുവെന്നും അദ്ദേഹം ആരോപിച്ചു.

പ്രധാനമന്ത്രി നരേന്ദ്ര മോദി രാമക്ഷേത്രം നിർമ്മിച്ചു, ഔറംഗസേബ് തകർത്ത കാശി വിശ്വനാഥ് ഇടനാഴിയും നിർമ്മിച്ചു. സോമനാഥ് ക്ഷേത്രവും സ്വർണ്ണം കൊണ്ട് നിർമ്മിക്കുകയാണ്. മോദി രാജ്യത്തെ സുരക്ഷിതവും സമൃദ്ധവുമാക്കിയെന്നും ഷാ പറഞ്ഞു.

23 ന് മഹാ വികാസ് അഘാഡി മഹാരാഷ്ട്രയിൽ നിന്ന് തുടച്ചുനീക്കപ്പെടാൻ പോകുന്നു. 23 ന് മഹായുതി സർക്കാർ ഇവിടെ രൂപീകരിക്കുമെന്നും അദ്ദേഹം പറഞ്ഞു. 

"രാഹുലും കോൺഗ്രസും അദ്ദേഹത്തിൻ്റെ സഹപ്രവർത്തകരും കശ്മീരിൽ ആർട്ടിക്കിൾ 370 തിരികെ കൊണ്ടുവരാൻ പ്രമേയം പാസാക്കി. രാഹുൽ ബാബ, ശ്രദ്ധയോടെ കേൾക്കൂ, നിങ്ങൾ മാത്രമല്ല, നിങ്ങളുടെ നാലാം തലമുറ വന്നാലും ആർട്ടിക്കിൾ 370 തിരികെ കൊണ്ടുവരാൻ കഴിയില്ല"-അദ്ദേഹം പറഞ്ഞു.