ആണവായുധങ്ങള്‍ യുദ്ധത്തിനല്ല, ഭയം സൃഷ്ടിക്കാനാണ് ഉദ്ദേശിച്ചിരിക്കുന്നത്. അതിനാല്‍ ഇന്ത്യ ഇനി ആണവ ബ്ലാക്ക് മെയിലിംഗിനെ ഭയപ്പെടുന്നില്ല. ഇന്ത്യ പുതിയതും പഴയതുമായ യുദ്ധരീതികള്‍ക്ക് തയ്യാറാകണം. ചൈന, പാകിസ്ഥാന്‍, ബംഗ്ലാദേശ് എന്നീ രാജ്യങ്ങള്‍ തമ്മിലുള്ള സഖ്യം ഇന്ത്യയുടെ സുരക്ഷയെ ബാധിച്ചേക്കാമെന്ന് സിഡിഎസ് ജനറല്‍ അനില്‍ ചൗഹാന്‍

ഡല്‍ഹി: ചൈന, പാകിസ്ഥാന്‍, ബംഗ്ലാദേശ് എന്നീ രാജ്യങ്ങള്‍ തമ്മിലുള്ള താല്‍പ്പര്യങ്ങളുടെ കൂട്ടുകെട്ട് ഇന്ത്യയുടെ സ്ഥിരതയെയും സുരക്ഷയെയും ഗൗരവമായി ബാധിക്കുമെന്ന് ചീഫ് ഓഫ് ഡിഫന്‍സ് സ്റ്റാഫ് (സിഡിഎസ്) ജനറല്‍ അനില്‍ ചൗഹാന്‍ പറഞ്ഞു. ആണവായുധ ഭീഷണികളെ ഇന്ത്യ ഇനി ഭയപ്പെടുന്നില്ലെന്നും അദ്ദേഹം വ്യക്തമാക്കി.

'ആണവായുധങ്ങള്‍ യുദ്ധത്തിനല്ല, ഭയം സൃഷ്ടിക്കാനാണ് ലക്ഷ്യമിടുന്നത്. എന്നാല്‍, ഇത്തരത്തിലുള്ള തന്ത്രങ്ങള്‍ ഇനി ഇന്ത്യയെ ബാധിക്കില്ല,' എന്ന് ജനറല്‍ ചൗഹാന്‍ പറഞ്ഞു.

അടുത്തിടെ നടന്ന ഓപ്പറേഷന്‍ സിന്ദൂറിനെക്കുറിച്ച് പരാമര്‍ശിച്ച അദ്ദേഹം, രണ്ട് ആണവായുധ സമ്പന്ന രാജ്യങ്ങള്‍ തമ്മിലുള്ള ഏറ്റുമുട്ടലിന്റെ അപൂര്‍വ ഉദാഹരണമാണ് ഇത് എന്നും കൂട്ടിച്ചേര്‍ത്തു.

ഒരു തിങ്ക് ടാങ്ക് സെമിനാറില്‍ സംസാരിക്കവെ, ചൈന-പാകിസ്ഥാന്‍ കൂട്ടുകെട്ടിനെ കുറിച്ച് അദ്ദേഹം വിശദീകരിച്ചു. കഴിഞ്ഞ അഞ്ച് വര്‍ഷത്തിനിടെ പാകിസ്ഥാന്‍ അതിന്റെ ആയുധങ്ങളുടെയും ഉപകരണങ്ങളുടെയും 70-80% വരെ ചൈനയില്‍ നിന്നാണ് വാങ്ങിയതെന്നും, ഇരു രാജ്യങ്ങള്‍ തമ്മിലുള്ള തന്ത്രപരമായ സൗഹൃദം ശക്തമാണെന്നും അദ്ദേഹം പറഞ്ഞു.

ചൈന, പാകിസ്ഥാന്‍, ബംഗ്ലാദേശ് എന്നിവയ്ക്കിടയിലെ താല്‍പ്പര്യങ്ങളുടെ കൂട്ടുകെട്ട് ഇന്ത്യയ്ക്ക് പ്രതികൂലമായ സാഹചര്യം സൃഷ്ടിക്കുമെന്ന് ചൂണ്ടിക്കാട്ടി.

'ഇന്ത്യ വൈവിധ്യങ്ങളുടെ രാജ്യമാണെന്നും, ആഭ്യന്തരവും സാമൂഹികവുമായ സുരക്ഷയ്ക്ക് വലിയ പ്രാധാന്യമുണ്ട്. പഴയതും പുതിയതുമായ യുദ്ധങ്ങള്‍ക്ക് ഇന്ത്യ സജ്ജമാണ്,' എന്നും അദ്ദേഹം പറഞ്ഞു.

ഓപ്പറേഷന്‍ സിന്ദൂരിന്റെ സമയത്ത് കരസേന, നാവികസേന, വ്യോമസേന എന്നിവ തമ്മില്‍ മികച്ച ഏകോപനം ഉണ്ടായിരുന്നു എന്നും അദ്ദേഹം കൂട്ടിച്ചേര്‍ത്തു.