ചെന്നൈ അണ്ണാ യൂണിവേഴ്‌സിറ്റിയിലെ ലൈംഗികാതിക്രമക്കേസിലെ പ്രതി കുറ്റക്കാരനാണെന്ന് കണ്ടെത്തി

ചെന്നൈ: അണ്ണാ സര്‍വകലാശാല ലൈംഗികാതിക്രമക്കേസിലെ പ്രതി കുറ്റക്കാരനാണെന്ന് മഹിളാ കോടതി പ്രഖ്യാപിച്ചു. ജ്ഞാനശേഖരനെതിരെ ചുമത്തിയ എല്ലാ കുറ്റങ്ങളും തെളിയിക്കപ്പെട്ടിട്ടുണ്ടെന്ന് കോടതി പറഞ്ഞു.

കഴിഞ്ഞ വര്‍ഷം ഡിസംബര്‍ 23 ന് രാത്രി 8 മണിയോടെയാണ് സംഭവം നടന്നത്. കോട്ടൂര്‍ സ്വദേശിയായ ജ്ഞാനശേഖരന്‍ കാമ്പസിനടുത്ത് ബിരിയാണി കട നടത്തിയിരുന്നു. 

ഇയാള്‍ സര്‍വകലാശാലാ പരിസരത്ത് അതിക്രമിച്ച് കയറി ആളൊഴിഞ്ഞ സ്ഥലത്ത് ഒരു വിദ്യാര്‍ത്ഥിനിയെ ലൈംഗികമായി പീഡിപ്പിക്കുകയും അവരുടെ പുരുഷ സുഹൃത്തിനെ ആക്രമിക്കുകയും ചെയ്തു. സംഭവത്തിന്റെ വീഡിയോ ചിത്രീകരിച്ച് ഇരുവരെയും ബ്ലാക്ക് മെയില്‍ ചെയ്തതായി പോലീസ് പറഞ്ഞു.

കേസില്‍ നിന്ന് മോചനം തേടി ജ്ഞാനശേഖരന്‍ നേരത്തെ ഒരു ഹര്‍ജി ഫയല്‍ ചെയ്തിരുന്നു. തനിക്കെതിരെ തെളിവുകളില്ലെന്നും സംശയത്തിന്റെ അടിസ്ഥാനത്തിലാണ് അറസ്റ്റ് ചെയ്തതെന്നും അദ്ദേഹം വാദിച്ചു.

തമിഴ്നാട് പോലീസ് എതിര്‍ ഹര്‍ജി ഫയല്‍ ചെയ്തു, ഇരുവശത്തുനിന്നും വാദങ്ങള്‍ കോടതിയില്‍ സമര്‍പ്പിച്ചു.