കോഡിംഗിലും യുക്തിചിന്തയിലും ഇനി 'സോണറ്റ്' തരംഗം; ക്ലോഡ് 4.6 സോണറ്റ് മോഡൽ അവതരിപ്പിച്ച് ആന്ത്രോപിക്

ഡല്‍ഹി: ആര്‍ട്ടിഫിഷ്യല്‍ ഇന്റലിജന്‍സ് രംഗത്തെ പ്രമുഖരായ ആന്ത്രോപിക് തങ്ങളുടെ ഏറ്റവും പുതിയ എഐ മോഡലായ ക്ലോഡ് 4.6 സോണറ്റ് പുറത്തിറക്കി. ക്ലോഡ് ഓപ്പസ് 4.6 അവതരിപ്പിച്ച് ആഴ്ചകള്‍ക്കുള്ളിലാണ് കമ്പനി പുതിയ പതിപ്പുമായി എത്തിയിരിക്കുന്നത്. കോഡിംഗ്, യുക്തിചിന്ത എന്നിവയില്‍ നിലവിലുള്ള മോഡലുകളേക്കാള്‍ മികച്ച പ്രകടനമാണ് സോണറ്റ് 4.6 കാഴ്ചവെക്കുന്നതെന്ന് കമ്പനി അവകാശപ്പെടുന്നു.

ക്ലോഡ് ചാറ്റ്‌ബോട്ടിന്റെ ഡിഫോള്‍ട്ട് മോഡലായി സോണറ്റ് 4.6 മാറും. സൗജന്യമായി ഉപയോഗിക്കുന്നവര്‍ക്കും പ്രോ സബ്സ്‌ക്രൈബര്‍മാര്‍ക്കും ഈ മോഡല്‍ ലഭ്യമാണ്. സൗജന്യ ഉപയോക്താക്കള്‍ക്ക് നിശ്ചിത സമയപരിധിക്കുള്ളില്‍ പരിമിതമായ ഉപയോഗമേ അനുവദിക്കൂ.

സോഫ്റ്റ്വെയര്‍ കോഡുകള്‍ എഴുതുന്നതിനും അവയിലെ പിഴവുകള്‍ കണ്ടെത്തുന്നതിനും ഈ മോഡല്‍ കൂടുതല്‍ കാര്യക്ഷമമാണ്. നിര്‍ദ്ദേശങ്ങള്‍ കൃത്യമായി പാലിച്ച് തെറ്റില്ലാത്ത കോഡുകള്‍ നല്‍കുന്നതില്‍ മുന്‍പത്തെ മോഡലുകളേക്കാള്‍ സോണറ്റ് 4.6 മുന്നിലാണെന്ന് ആന്ത്രോപിക് പറയുന്നു.

ഈ മോഡലിന്റെ ബീറ്റാ പതിപ്പില്‍ 1 മില്യണ്‍ ടോക്കണ്‍ കോണ്‍ടെക്സ്റ്റ് വിന്‍ഡോ ലഭ്യമാണ്. ഇതുകാരണം വലിയ നിയമരേഖകള്‍, സാമ്പത്തിക റിപ്പോര്‍ട്ടുകള്‍, വലിയ കോഡ് ഫയലുകള്‍ എന്നിവ വിശകലനം ചെയ്യാനും ഓര്‍മ്മിച്ചുവെക്കാനും മോഡലിന് സാധിക്കും.

എഐ മോഡലുകള്‍ തെറ്റായ വിവരങ്ങള്‍ നല്‍കുന്ന രീതി, ഉപയോക്താവ് പറയുന്നത് തെറ്റാണെങ്കില്‍ പോലും അതിനോട് യോജിക്കുന്ന പ്രവണത എന്നിവ പുതിയ മോഡലില്‍ ഗണ്യമായി കുറച്ചിട്ടുണ്ട്.

ഓപ്പണ്‍ എഐ, ഗൂഗിള്‍ തുടങ്ങിയ കമ്പനികള്‍ തങ്ങളുടെ മോഡലുകള്‍ അതിവേഗം പരിഷ്‌കരിച്ചുകൊണ്ടിരിക്കുന്ന സാഹചര്യത്തിലാണ് ആന്ത്രോപിക്കിന്റെ ഈ നീക്കം.