പുതുവത്സര ദിനത്തിൽ തീപിടുത്തത്തിൽ നിന്ന് രക്ഷപ്പെടാൻ ജർമ്മനിയിലെ അപ്പാർട്ട്മെന്റിൽ നിന്ന് ചാടി. തെലങ്കാന വിദ്യാർത്ഥി മരിച്ചു

ഡല്‍ഹി: പുതുവത്സര ദിനത്തില്‍ ജര്‍മ്മനിയുടെ തലസ്ഥാനമായ ബെര്‍ലിനിലെ തന്റെ അപ്പാര്‍ട്ട്‌മെന്റില്‍ ഉണ്ടായ തീപിടുത്തത്തില്‍ നിന്ന് രക്ഷപ്പെടാന്‍ ശ്രമിച്ച തെലങ്കാനയില്‍ നിന്നുള്ള 25 വയസ്സുള്ള വിദ്യാര്‍ത്ഥി മരിച്ചു. ജങ്കാവ് ജില്ലയിലെ മല്‍കാപൂര്‍ ഗ്രാമവാസിയായ ഹൃതിക് റെഡ്ഡിയാണ് മരിച്ച വിദ്യാര്‍ത്ഥിയെന്ന് തിരിച്ചറിഞ്ഞിട്ടുണ്ട്.

റെഡ്ഡിയുടെ അപ്പാര്‍ട്ട്‌മെന്റില്‍ വന്‍ തീപിടുത്തമുണ്ടായതായി റിപ്പോര്‍ട്ടുണ്ട്. അതിവേഗം പടരുന്ന തീയില്‍ നിന്നും കട്ടിയുള്ള പുകയില്‍ നിന്നും രക്ഷപ്പെടാന്‍ ശ്രമിക്കുന്നതിനിടെ കെട്ടിടത്തിന്റെ മുകളിലത്തെ നിലയില്‍ നിന്ന് ചാടിയതായും തലയ്ക്ക് ഗുരുതരമായി പരിക്കേറ്റതായും റിപ്പോര്‍ട്ടുണ്ട്. തുടര്‍ന്ന്, അടുത്തുള്ള ആശുപത്രിയില്‍ എത്തിച്ചെങ്കിലും ചികിത്സയ്ക്കിടെ മരിച്ചു.

യൂറോപ്പ് സര്‍വകലാശാലയില്‍ ബിരുദാനന്തര ബിരുദം നേടുന്നതിനായി റെഡ്ഡി 2023 ജൂണില്‍ ജര്‍മ്മനിയിലെ മാഗ്‌ഡെബര്‍ഗിലേക്ക് താമസം മാറി.

2022 ല്‍ വാഗ്‌ദേവി കോളേജ് ഓഫ് എഞ്ചിനീയറിംഗില്‍ നിന്ന് ബിരുദം നേടി. ദസറ സമയത്ത് നടത്താനിരുന്ന വീട്ടിലേക്കുള്ള സന്ദര്‍ശനം അദ്ദേഹം മാറ്റിവച്ചിരുന്നു. പകരം ജനുവരി രണ്ടാം വാരത്തില്‍ സംക്രാന്തി ഉത്സവത്തിനായി തിരിച്ചെത്താന്‍ ഉദ്ദേശിച്ചിരുന്നു.