ഡൽഹിയിലെ വായു ഗുണനിലവാര സൂചിക വഷളാകുന്നു, ഗ്രാപ്പ് 2 നിയന്ത്രണങ്ങൾ പ്രാബല്യത്തിൽ

ഡല്‍ഹി: ഡല്‍ഹിയിലും പരിസര പ്രദേശങ്ങളിലും വായുവിന്റെ ഗുണനിലവാരം 'വളരെ മോശം' വിഭാഗത്തില്‍ തന്നെ തുടരുന്നുവെന്ന് കേന്ദ്ര മലിനീകരണ നിയന്ത്രണ ബോര്‍ഡ് (സിപിസിബി) അറിയിച്ചു.

ദീപാവലി ദിവസം രാവിലെ ദേശീയ തലസ്ഥാനത്തെ മൊത്തത്തിലുള്ള വായു ഗുണനിലവാര സൂചിക 333 ആയിരുന്നുവെന്ന് അവര്‍ പറഞ്ഞു. 

0 നും 50 നും ഇടയിലുള്ള എക്യുഐ 'നല്ലത്' എന്നും, 51 നും 100 നും ഇടയിലുള്ളത് 'തൃപ്തികരം' എന്നും, 101 നും 200 നും ഇടയില്‍ 'മിതമായത്' എന്നും, 201 നും 300 നും ഇടയില്‍ 'മോശം' എന്നും, 301 നും 400 നും ഇടയില്‍ 'വളരെ മോശം' എന്നും, 401 നും 500 നും ഇടയിലുള്ളത് 'ഗുരുതരം' എന്നും കണക്കാക്കുന്നു.

തിങ്കളാഴ്ച രാവിലെ നഗര-സംസ്ഥാനങ്ങളിലെ വായു ഗുണനിലവാര സൂചിക 333 ആയിരുന്നെങ്കിലും, ചില ഭാഗങ്ങളില്‍ അത് 'സെവര്‍' വിഭാഗത്തിലേക്ക് താഴ്ന്നു. 

റിയല്‍-ടൈം മോണിറ്ററിംഗ് സൈറ്റായ വേള്‍ഡ് എയര്‍ ക്വാളിറ്റി ഇന്‍ഡക്‌സ് പ്രോജക്റ്റ് (എക്യുഐസിഎന്‍) പ്രകാരം, ആനന്ദ് വിഹാറിലെ വായു ഗുണനിലവാര സൂചിക തിങ്കളാഴ്ച രാവിലെ 464 ആയിരുന്നു. രോഹിണിയിലും സത്യവതി കോളേജിലും 'സീവര്‍' വിഭാഗത്തിലും ഇത് യഥാക്രമം 403 ഉം 432 ഉം ആയിരുന്നു.

ഡല്‍ഹിയില്‍ വായു ഗുണനിലവാര സൂചിക വഷളായതോടെ, എന്‍സിആര്‍ മേഖലയിലുടനീളം കമ്മീഷന്‍ ഫോര്‍ എയര്‍ ക്വാളിറ്റി മാനേജ്മെന്റ് (സിഎക്യുഎം) ഞായറാഴ്ച വൈകുന്നേരം ഗ്രേഡഡ് റെസ്പോണ്‍സ് ആക്ഷന്‍ പ്ലാനിന്റെ (ജിആര്‍എപി) രണ്ടാം ഘട്ടം നടപ്പിലാക്കി. 

'ഡല്‍ഹിയിലെ വായു ഗുണനിലവാര സൂചിക രാവിലെ മുതല്‍ വര്‍ദ്ധിച്ചുവരുന്ന പ്രവണത കാണിക്കുന്നു, വൈകുന്നേരം 4 മണിക്ക് 296 ഉം വൈകുന്നേരം 7 മണിക്ക് 302 ഉം ആയി രേഖപ്പെടുത്തിയിട്ടുണ്ട്,' സിഎക്യുഎം പ്രസ്താവനയില്‍ പറഞ്ഞു.