ഡൽഹിയിലെ വായു കൂടുതൽ അപകടകരമാകുന്നു; പല പ്രദേശങ്ങളിലും 400 കടന്ന് വായു ഗുണനിലവാര സൂചിക (എക്യുഐ) ഗുരുതര വിഭാഗത്തിൽ

ഡല്‍ഹി: ഡല്‍ഹിയിലെ വായു കൂടുതല്‍ വിഷലിപ്തമായി മാറിയിരിക്കുന്നു. പല പ്രദേശങ്ങളിലും വായു ഗുണനിലവാര സൂചിക ഗുരുതരമായ വിഭാഗത്തില്‍ എത്തി. അക്ഷര്‍ധാമില്‍ കേന്ദ്ര മലിനീകരണ നിയന്ത്രണ ബോര്‍ഡിന്റെ കണക്കനുസരിച്ച് വായു ഗുണനിലവാര സൂചിക 405 ആയി രജിസ്റ്റര്‍ ചെയ്തിട്ടുണ്ട്.

എയിംസ് പ്രദേശത്ത് നിന്നും സമാനമായ ദൃശ്യങ്ങള്‍ പുറത്തുവന്നിട്ടുണ്ട്, അവിടെ വായുവിന്റെ ഗുണനിലവാരം കൂടുതല്‍ വഷളായി, എക്യൂഐ 420 ആയി കണ്ടെത്തി.

സിപിസിബി മാനദണ്ഡങ്ങള്‍ അനുസരിച്ച്, 0-50 നും ഇടയിലുള്ള എക്യൂഐ 'നല്ലത്', 51-100 'തൃപ്തികരം', 101-200 'മിതമായത്', 201-300 'മോശം', 301-400 'വളരെ മോശം', 401-500 'ഗുരുതരം' എന്നിങ്ങനെയാണ് കണക്കാക്കുന്നത്.

പാര്‍ലമെന്റില്‍ നടക്കുന്ന ശൈത്യകാല സമ്മേളനത്തില്‍ പ്രതിപക്ഷം ഡല്‍ഹി മലിനീകരണ വിഷയം ഉന്നയിക്കാന്‍ സാധ്യതയുണ്ട്.

കുട്ടികളും പ്രായമായവരും ദുരിതമനുഭവിക്കുന്നതിനാല്‍ രാജ്യതലസ്ഥാനത്തെ മലിനീകരണം ഒരു പ്രധാന ആശങ്കയാണെന്ന് കോണ്‍ഗ്രസ് നേതാവ് പ്രിയങ്ക ഗാന്ധി പറഞ്ഞു. ഈ സാഹചര്യം ഉടനടി പരിഹരിക്കണമെന്ന് അവര്‍ പറഞ്ഞു.