ഡൽഹി ഗ്യാസ് ചേമ്പറായി തുടരുന്നു; പ്രതീക്ഷ നൽകി കാലാവസ്ഥാ പ്രവചനം

ഡല്‍ഹി: ദേശീയ തലസ്ഥാനത്തിന്റെ വായുവിന്റെ ഗുണനിലവാരം നേരിയ തോതില്‍ മെച്ചപ്പെട്ട് 'വളരെ മോശം' വിഭാഗത്തിലേക്ക് എത്തി. ബുധനാഴ്ചയും ഇടതൂര്‍ന്ന മൂടല്‍മഞ്ഞ് തുടരാന്‍ സാധ്യതയുണ്ടെന്ന് ഇന്ത്യന്‍ കാലാവസ്ഥാ വകുപ്പ് പ്രവചിച്ചു. 

കേന്ദ്ര മലിനീകരണ നിയന്ത്രണ ബോര്‍ഡിന്റെ ഡാറ്റ പ്രകാരം, ഡല്‍ഹിയില്‍ 24 മണിക്കൂര്‍ ശരാശരി വായു ഗുണനിലവാര സൂചിക 388 ആയി രേഖപ്പെടുത്തി, തിങ്കളാഴ്ച ഇത് 401 ആയിരുന്നു.

ഡല്‍ഹിയിലെ 17 വായു ഗുണനിലവാര നിരീക്ഷണ കേന്ദ്രങ്ങള്‍ 'വളരെ മോശം' വിഭാഗത്തില്‍ മലിനീകരണ തോത് രേഖപ്പെടുത്തിയപ്പോള്‍, മറ്റ് 17 എണ്ണം 'ഗുരുതര' റീഡിംഗുകള്‍ രേഖപ്പെടുത്തി.

ആനന്ദ് വിഹാര്‍ വായു ഗുണനിലവാരം 460 ആയി രേഖപ്പെടുത്തിയതായി സമീര്‍ ആപ്പ് പറയുന്നു. 0 നും 50 നും ഇടയിലുള്ള വായു ഗുണനിലവാരം 'നല്ലത്', 51 മുതല്‍ 100 വരെ 'തൃപ്തികരം', 101 മുതല്‍ 200 വരെ 'മിതമായത്', 201 മുതല്‍ 300 വരെ 'മോശം', 301 മുതല്‍ 400 വരെ 'വളരെ മോശം', 401 മുതല്‍ 500 വരെ 'ഗുരുതരം' എന്നിങ്ങനെയാണ് കണക്കാക്കുന്നത്.