'ഒരു ഡ്രോണിനോ മിസൈലിനോ തുളച്ചുകയറാന്‍ കഴിയാത്ത ഒരു അജയ്യമായ മതില്‍ പോലെയാണ് നമ്മുടെ കരസേനാ വ്യോമ പ്രതിരോധം നിലകൊണ്ടത്‌. ഭീകരതയെ പിന്തുണയ്ക്കുന്നവരെ ഇനി വെറുതെ വിടില്ല'; പാകിസ്ഥാനെതിരെ ആഞ്ഞടിച്ച് കരസേനാ മേധാവി

ഡല്‍ഹി: കാര്‍ഗില്‍ വിജയ് ദിവസ ആഘോഷ വേളയില്‍, ഇന്ത്യന്‍ സൈന്യത്തിന്റെ തയ്യാറെടുപ്പുകള്‍, മാറ്റങ്ങള്‍, പാകിസ്ഥാന് നല്‍കിയ മറുപടി എന്നിവയെക്കുറിച്ച് കരസേനാ മേധാവി ജനറല്‍ ഉപേന്ദ്ര ദ്വിവേദി വിശദീകരിച്ചു. 

മെയ് 7 മുതല്‍ 9 വരെ പാകിസ്ഥാന്‍ നടത്തിയ പ്രവര്‍ത്തനങ്ങള്‍ക്ക് ഇന്ത്യന്‍ സൈന്യം കൃത്യമായ നല്‍കിയെന്ന് അദ്ദേഹം പറഞ്ഞു. ഒരു ഡ്രോണിനോ മിസൈലിനോ തുളച്ചുകയറാന്‍ കഴിയാത്ത ഒരു അജയ്യമായ മതില്‍ പോലെയാണ് നമ്മുടെ കരസേനാ വ്യോമ പ്രതിരോധം നിലകൊണ്ടതെന്നും അദ്ദേഹം പറഞ്ഞു.

കരസേന, വ്യോമസേന, നാവികസേന, മറ്റ് സര്‍ക്കാര്‍ വകുപ്പുകള്‍ എന്നിവ ഒരുമിച്ച് പ്രവര്‍ത്തിച്ച സമ്പൂര്‍ണ്ണ രാഷ്ട്ര സമീപനത്തിന്റെ ഫലമാണ് ഈ വിജയമെന്ന് ജനറല്‍ ദ്വിവേദി പറഞ്ഞു.

ഇന്ത്യയുടെ പരമാധികാരത്തിനോ, സമഗ്രതയ്ക്കോ, പൗരന്മാര്‍ക്കോ ദോഷം വരുത്താന്‍ ശ്രമിക്കുന്ന ഏതൊരു ശക്തിക്കും ഇപ്പോള്‍ ഉചിതമായ മറുപടി ലഭിക്കുമെന്ന് അദ്ദേഹം വ്യക്തമാക്കി. 

പരിവര്‍ത്തനാത്മകവും, ആധുനികവും, ഭാവി ലക്ഷ്യമാക്കിയുള്ളതുമായ ഒരു ശക്തിയായി ഇന്ത്യന്‍ സൈന്യം ഇപ്പോള്‍ അതിവേഗം മുന്നേറുകയാണെന്ന് അദ്ദേഹം പറഞ്ഞു.

ഈ ദിശയില്‍ കാലാള്‍പ്പട, യന്ത്രവല്‍കൃത കാലാള്‍പ്പട, കവചിത യൂണിറ്റുകള്‍, പീരങ്കിപ്പട, പ്രത്യേക സേന, ആളില്ലാ വ്യോമ സംവിധാനങ്ങള്‍ തുടങ്ങിയ പോരാട്ട ഘടകങ്ങള്‍ ചേര്‍ത്തിട്ടുള്ള 'രുദ്ര' രൂപത്തില്‍ എല്ലാ ആയുധ ബ്രിഗേഡുകളും രൂപീകരിക്കുന്നുണ്ടെന്ന് ജനറല്‍ ഉപേന്ദ്ര ദ്വിവേദി പറഞ്ഞു. ഈ യൂണിറ്റുകള്‍ക്ക് പ്രത്യേകം രൂപകല്‍പ്പന ചെയ്ത ലോജിസ്റ്റിക്‌സും പോരാട്ട പിന്തുണയും ലഭിക്കും.