ലംബോർഗിനി അപകടം: പുകയില വ്യാവസായിയുടെ മകൻ ശിവം മിശ്രയ്ക്ക് ജാമ്യം; അറസ്റ്റിൽ വീഴ്ച വരുത്തിയെന്ന് കോടതി

കാണ്‍പൂര്‍: നഗരത്തിലെ വിഐപി റോഡില്‍ കാല്‍നടയാത്രക്കാര്‍ക്കിടയിലേക്ക് ലംബോര്‍ഗിനി കാര്‍ ഇടിച്ചുകയറ്റിയ സംഭവത്തില്‍ അറസ്റ്റിലായ പ്രമുഖ പുകയില വ്യാവസായിയുടെ മകന്‍ ശിവം മിശ്രയ്ക്ക് (24) കോടതി ജാമ്യം അനുവദിച്ചു.

അറസ്റ്റ് നടപടികളില്‍ പോലീസ് നിയമപരമായ ചട്ടങ്ങള്‍ പാലിച്ചില്ലെന്ന് ചൂണ്ടിക്കാട്ടിയാണ് കാണ്‍പൂര്‍ കോടതിയുടെ നടപടി. സ്വന്തം കേസ് കോടതിയില്‍ നേരിട്ട് വാദിച്ച ശിവത്തെ 20,000 രൂപയുടെ വ്യക്തിഗത ബോണ്ടില്‍ വിട്ടയച്ചു.

ശിവം മിശ്രയെ 14 ദിവസത്തെ ജുഡീഷ്യല്‍ റിമാന്‍ഡില്‍ വിടണമെന്ന പോലീസിന്റെ അപേക്ഷ കോടതി തള്ളി. കേസ് പരിഗണിക്കുന്നതിനിടെ പോലീസ് നടപടികളെ ജഡ്ജി രൂക്ഷമായി വിമര്‍ശിച്ചു.

ഭാരതീയ നാഗരിക് സുരക്ഷാ സംഹിത പ്രകാരം അറസ്റ്റിന് മുമ്പ് നല്‍കേണ്ട നോട്ടീസ് (സെക്ഷന്‍ 35(3)) നിയമപരമല്ലെന്ന് കോടതി കണ്ടെത്തി.
നിയമപരമായ സുരക്ഷാ മുന്‍കരുതലുകള്‍ പാലിക്കാതെ നടത്തുന്ന അറസ്റ്റ് സാധുവായി കണക്കാക്കാനാവില്ലെന്ന് കോടതി ഉത്തരവില്‍ വ്യക്തമാക്കി.

അറസ്റ്റ് കഴിഞ്ഞ് കേവലം ആറ് മണിക്കൂറിനുള്ളിലാണ് ശിവം മിശ്രയ്ക്ക് ജാമ്യം ലഭിച്ചത്. എങ്കിലും കര്‍ശനമായ ഉപാധികളോടെയാണ് കോടതി വിട്ടയച്ചിരിക്കുന്നത്.

അന്വേഷണവുമായി പൂര്‍ണ്ണമായും സഹകരിക്കണം.ആവശ്യപ്പെടുമ്പോള്‍ കോടതിയില്‍ ഹാജരാകണം. സാക്ഷികളെ സ്വാധീനിക്കാനോ തെളിവുകള്‍ നശിപ്പിക്കാനോ ശ്രമിക്കരുത്. കഴിഞ്ഞ ഞായറാഴ്ചയാണ് കാണ്‍പൂരില്‍ അമിതവേഗതയിലെത്തിയ ലംബോര്‍ഗിനി കാര്‍ കാല്‍നടയാത്രക്കാര്‍ക്കും മറ്റ് വാഹനങ്ങള്‍ക്കും ഇടയിലേക്ക് പാഞ്ഞുകയറിയത്.

വലിയ ജനരോഷത്തിന് കാരണമായ ഈ സംഭവത്തില്‍ കാര്‍ ഓടിച്ചിരുന്നത് ശിവം മിശ്രയാണെന്നാണ് പോലീസിന്റെ വാദം. നിലവില്‍ ജാമ്യം ലഭിച്ചെങ്കിലും കേസില്‍ നിയമപരമായ അന്വേഷണം തുടരുമെന്ന് അധികൃതര്‍ അറിയിച്ചു.