ഭരണഘടനയുടെ ആത്മാവ് മനസ്സിലാക്കുന്നതിൽ ഹിമാന്ത ബിശ്വ ശർമ്മയെപ്പോലുള്ളവർ പരാജയപ്പെട്ടു. ഇന്ത്യ ഒരു മതത്തിന്റെയോ സമൂഹത്തിന്റെയോ സ്വന്തമല്ല. അതാണ് രാജ്യത്തിന്റെ സൗന്ദര്യമെന്ന് ഒവൈസി

ഡല്‍ഹി: അസം മുഖ്യമന്ത്രിയെ 'ട്യൂബ് ലൈറ്റ്' എന്ന് വിശേഷിപ്പിച്ച് ഓള്‍ ഇന്ത്യ മജ്ലിസ്-ഇ-ഇത്തേഹാദുല്‍ മുസ്ലിമീന്‍ (എഐഎംഐഎം) മേധാവി അസദുദ്ദീന്‍ ഒവൈസി രംഗത്ത്.

അദ്ദേഹത്തിന് 'പാകിസ്ഥാന് സമാനമായ മാനസികാവസ്ഥ' ഉണ്ടെന്ന് പറഞ്ഞതിനെത്തുടര്‍ന്ന് ഞായറാഴ്ച ഹിമാന്ത ബിശ്വ ശര്‍മ്മയും അസദുദ്ദീന്‍ ഒവൈസിയും തമ്മിലുള്ള 'വാക്‌പോര് ശക്തമായി.

മഹാരാഷ്ട്ര മുനിസിപ്പല്‍ കോര്‍പ്പറേഷന്‍ തെരഞ്ഞെടുപ്പ് പ്രചാരണത്തിനിടെ നാഗ്പൂരില്‍ മാധ്യമപ്രവര്‍ത്തകരോട് സംസാരിക്കുകയായിരുന്നു ഒവൈസി. ഭരണഘടനയുടെ ആത്മാവ് മനസ്സിലാക്കുന്നതില്‍ ശര്‍മ്മയെപ്പോലുള്ളവര്‍ പരാജയപ്പെട്ടുവെന്നും ഇന്ത്യ ഒരു മതത്തിന്റെയോ സമൂഹത്തിന്റെയോ സ്വന്തമല്ലെന്നും അതാണ് രാജ്യത്തിന്റെ സൗന്ദര്യമെന്നും അദ്ദേഹം കൂട്ടിച്ചേര്‍ത്തു.

'അദ്ദേഹം ഒരു 'ട്യൂബ്ലൈറ്റ്' ആണ്. ഭരണഘടനയില്‍ സത്യപ്രതിജ്ഞ ചെയ്തിട്ടുണ്ട്, പക്ഷേ അതില്‍ എന്താണ് എഴുതിയിരിക്കുന്നതെന്ന് അദ്ദേഹത്തിന് അറിയാമോ? ഹിമാന്ത ബിശ്വ ശര്‍മ്മയ്ക്ക് പാകിസ്ഥാന്‍ പോലുള്ള ഒരു മാനസികാവസ്ഥയുണ്ട്.

പാകിസ്ഥാന്‍ ഭരണഘടനയില്‍, ഒരു സമുദായത്തില്‍ നിന്നുള്ള ഒരാള്‍ക്ക് മാത്രമേ രാജ്യത്തിന്റെ പ്രധാനമന്ത്രിയോ പ്രസിഡന്റോ ആകാന്‍ കഴിയൂ,' ഒവൈസി പറഞ്ഞതായി വാര്‍ത്താ ഏജന്‍സിയായ പിടിഐ റിപ്പോര്‍ട്ട് ചെയ്തു. 

'ദൈവത്തില്‍ വിശ്വസിക്കാത്തവര്‍ക്ക് പോലും ഇവിടെ സ്ഥാനമുണ്ട്. അദ്ദേഹത്തിന്റെ ചിന്താഗതി ഇടുങ്ങിയതാണ്, അദ്ദേഹം നിസ്സാരകാര്യങ്ങള്‍ സംസാരിക്കുന്നു.'അദ്ദേഹം കൂട്ടിച്ചേര്‍ത്തു.