പ്രിയങ്ക ഗാന്ധിയുടെ സന്ദർശനം കോൺഗ്രസിന് കരുത്താകും; ബിജെപി ഭരണം അവസാനിക്കുമെന്ന് അസം കോൺഗ്രസ് നേതൃത്വം

ഗുവാഹത്തി: നിയമസഭാ തിരഞ്ഞെടുപ്പിന് മുന്നോടിയായി എഐസിസി ജനറല്‍ സെക്രട്ടറിയും വയനാട് എംപിയുമായ പ്രിയങ്ക ഗാന്ധി വദ്ര നടത്തുന്ന രണ്ടുദിവസത്തെ അസം സന്ദര്‍ശനം പാര്‍ട്ടിക്ക് വലിയ ഊര്‍ജ്ജം നല്‍കുമെന്ന് കോണ്‍ഗ്രസ് നേതാക്കള്‍.

സംസ്ഥാനത്തെ ബിജെപി സര്‍ക്കാരിനെതിരെ രൂക്ഷമായ വിമര്‍ശനങ്ങളാണ് എപിസിസി വര്‍ക്കിംഗ് പ്രസിഡന്റ് സാക്കിര്‍ ഹുസൈന്‍ സിക്ദര്‍ ഉന്നയിച്ചത്.

പ്രിയങ്കയുടെ സന്ദര്‍ശനം പാര്‍ട്ടി പ്രവര്‍ത്തകര്‍ക്ക് പുതിയ കരുത്ത് നല്‍കുമെന്ന് സാക്കിര്‍ ഹുസൈന്‍ സിക്ദര്‍ പറഞ്ഞു. 'അസം കോണ്‍ഗ്രസ് പ്രവര്‍ത്തകര്‍ പ്രിയങ്കയെ വരവേല്‍ക്കാന്‍ ആവേശത്തോടെ കാത്തിരിക്കുകയാണ്. അവരുടെ സാന്നിധ്യം താഴെത്തട്ടിലുള്ള പ്രവര്‍ത്തകരെ ഉണര്‍ത്തും,' അദ്ദേഹം വ്യക്തമാക്കി.

മുഖ്യമന്ത്രി ഹിമന്ത ബിശ്വ ശര്‍മ്മയുടെ നേതൃത്വത്തിലുള്ള സര്‍ക്കാര്‍ പരാജയമാണെന്ന് കോണ്‍ഗ്രസ് ആരോപിച്ചു. സംസ്ഥാനത്ത് അഴിമതി വ്യാപകമാണെന്നും ജനങ്ങള്‍ ഈ ഭരണത്തില്‍ അസംതൃപ്തരാണെന്നും സിക്ദര്‍ പറഞ്ഞു. ഇത്തവണ ബിജെപി അധികാരത്തില്‍ തിരിച്ചെത്തില്ലെന്നും കോണ്‍ഗ്രസ് സര്‍ക്കാര്‍ രൂപീകരിക്കുമെന്നും അദ്ദേഹം ആത്മവിശ്വാസം പ്രകടിപ്പിച്ചു.

സ്ഥാനാര്‍ത്ഥി നിര്‍ണ്ണയത്തിനുള്ള സ്‌ക്രീനിംഗ് കമ്മിറ്റി അധ്യക്ഷ കൂടിയാണ് പ്രിയങ്ക ഗാന്ധി. സന്ദര്‍ശനത്തിന്റെ ഭാഗമായി അവര്‍ കാമാഖ്യ ക്ഷേത്രത്തില്‍ ദര്‍ശനം നടത്തും. തുടര്‍ന്ന് രാജീവ് ഭവനില്‍ നടക്കുന്ന സ്‌ക്രീനിംഗ് കമ്മിറ്റി യോഗങ്ങളില്‍ പങ്കെടുക്കും. ബ്ലോക്ക് കോണ്‍ഗ്രസ് നേതാക്കളുമായും പോഷക സംഘടനകളുമായും അവര്‍ ചര്‍ച്ച നടത്തും.

ഫെബ്രുവരി അവസാനത്തോടെ ആദ്യഘട്ട സ്ഥാനാര്‍ത്ഥി പട്ടിക പുറത്തിറക്കാന്‍ സാധിക്കുമെന്ന് ലോക്‌സഭയിലെ പ്രതിപക്ഷ ഉപനേതാവ് ഗൗരവ് ഗോഗോയ് പറഞ്ഞു. ബിജെപിയെ താഴെയിറക്കാന്‍ സമാന ചിന്താഗതിയുള്ള പാര്‍ട്ടികളുമായി സഖ്യം ഉറപ്പാണെന്നും അദ്ദേഹം കൂട്ടിച്ചേര്‍ത്തു.