കശ്മീരിലെ ഹസ്രത്ത്ബാല്‍ ദര്‍ഗയില്‍ സ്ഥാപിച്ചിരുന്ന അശോക ചിഹ്നം തകര്‍ത്ത കേസില്‍ 26 പേരെ അറസ്റ്റ് ചെയ്തു. ഹസ്രത്ത്ബാല്‍ ദര്‍ഗ സമാധാനത്തിന്റെ പ്രതീകം, ഇവിടെ ദേശീയ ചിഹ്നത്തെ അപമാനിക്കുന്നത് അപലപനീയമാണെന്ന് കേന്ദ്രമന്ത്രി കിരണ്‍ റിജിജു

ശ്രീനഗര്‍: ജമ്മു കശ്മീരിലെ ഹസ്രത്ത്ബാല്‍ ദര്‍ഗയില്‍ സ്ഥാപിച്ചിട്ടുള്ള അശോക ചിഹ്നം തകര്‍ത്ത കേസില്‍ അജ്ഞാതരായ ആളുകള്‍ക്കെതിരെ കേസ് രജിസ്റ്റര്‍ ചെയ്തു. ഇതിന്റെ അടിസ്ഥാനത്തില്‍ 26 പേരെ കസ്റ്റഡിയിലെടുത്തു. 

ഹസ്രത്ത്ബാല്‍ ദര്‍ഗ സമാധാനത്തിന്റെ പ്രതീകമാണെന്നും അത്തരമൊരു സ്ഥലത്ത് ദേശീയ ചിഹ്നത്തെ അപമാനിക്കുന്നത് അങ്ങേയറ്റം അപലപനീയമാണെന്നും പാര്‍ലമെന്ററി കാര്യ മന്ത്രിയും ന്യൂനപക്ഷകാര്യ മന്ത്രിയുമായ കിരണ്‍ റിജിജു പറഞ്ഞു.

'ഹസ്രത്ത്ബാല്‍ ദേവാലയം സമാധാനത്തിന്റെ പ്രതീകമാണ്. ഈ ദര്‍ഗയ്ക്ക് പ്രവാചകന്‍ മുഹമ്മദ് നബിയുടെ ഭൗതികാവശിഷ്ടങ്ങളുമായി ആഴത്തിലുള്ള ബന്ധമുണ്ട്, അത് വിശ്വാസത്തെയും ഐക്യത്തെയും യഥാര്‍ത്ഥത്തില്‍ പ്രതിഫലിപ്പിക്കുന്നു. ഹസ്രത്ത്ബാല്‍ ദര്‍ഗയുടെ ശിലാഫലകത്തില്‍ ആലേഖനം ചെയ്ത അശോക ചിഹ്നം തകര്‍ത്തതിനെ ഞാന്‍ ശക്തമായി അപലപിക്കുന്നു' എന്ന് കിരണ്‍ റിജിജു എക്സില്‍ കുറിച്ചു. 

ജമ്മു കശ്മീര്‍ വഖഫ് ബോര്‍ഡ് ചെയര്‍പേഴ്സണ്‍ ഡോ. ദരാക്ഷന്‍ ആന്‍ഡ്രാബിയുടെ ട്വീറ്റിന് മറുപടിയായാണ് കിരണ്‍ റിജിജു ഈ പോസ്റ്റ് എഴുതിയത്.

ഡോ. ദരാക്ഷന്‍ ഇതിനെ 'ഭീകരാക്രമണം' എന്ന് വിശേഷിപ്പിക്കുകയും പ്രതികള്‍ക്കെതിരെ കര്‍ശന നടപടി സ്വീകരിക്കണമെന്ന് ആവശ്യപ്പെടുകയും ചെയ്തിരുന്നു.