മണിപ്പൂരിൽ വാഹനവ്യൂഹത്തിനു നേരെ വെടിവെയ്പ്: രണ്ട് ജവാന്മാർ കൊല്ലപ്പെട്ടു

ഇംഫാല്‍: മണിപ്പൂരിലെ ബിഷ്ണുപൂര്‍ ജില്ലയില്‍ സുരക്ഷാ വാഹനവ്യൂഹത്തിന് നേരെ അജ്ഞാതരായ തോക്കുധാരികള്‍ പതിയിരുന്ന് നടത്തിയ ആക്രമണത്തില്‍ രണ്ട് അസം റൈഫിള്‍സ് ജവാന്‍മാര്‍ കൊല്ലപ്പെടുകയും നാല് പേര്‍ക്ക് പരിക്കേല്‍ക്കുകയും ചെയ്തു.

വൈകുന്നേരം 5.50 ഓടെയാണ് ആക്രമണം നടന്നത്. 33 അസം റൈഫിള്‍സ് ഉദ്യോഗസ്ഥരുമായി ഇംഫാലില്‍ നിന്ന് ബിഷ്ണുപൂരിലേക്ക് പോകുന്നതിനിടെയാണ് ആക്രമണം നടന്നത്. പരിക്കേറ്റവരെ അടുത്തുള്ള ആശുപത്രികളില്‍ പ്രവേശിപ്പിച്ചു. അവര്‍ ചികിത്സയിലാണ്.

മണിപ്പൂര്‍ ഗവര്‍ണര്‍ അജയ് കുമാര്‍ ഭല്ല ആക്രമണത്തെ 'ഹീനമായ അക്രമ പ്രവൃത്തി' എന്ന് വിശേഷിപ്പിച്ചു. രാജ്ഭവന്‍ എക്‌സില്‍ പങ്കിട്ട പ്രസ്താവനയില്‍, രണ്ട് അസം റൈഫിള്‍സ് ജവാന്മാരുടെ മരണത്തില്‍ ഗവര്‍ണര്‍ അഗാധമായ ദുഃഖം രേഖപ്പെടുത്തുകയും അവരുടെ കുടുംബങ്ങള്‍ക്ക് അനുശോചനം അറിയിക്കുകയും ചെയ്തു.