പ്രായപൂർത്തിയാകാത്ത സഹോദരിമാരെ തട്ടിക്കൊണ്ടുപോയി പീഡിപ്പിച്ച് ഓട്ടോ ഡ്രൈവർ

ഡല്‍ഹി: ഗുരുഗ്രാമില്‍ രണ്ട് പ്രായപൂര്‍ത്തിയാകാത്ത സഹോദരിമാരെ തട്ടിക്കൊണ്ടുപോയി ഓട്ടോറിക്ഷാ ഡ്രൈവര്‍ ബലാത്സംഗം ചെയ്തു. സംഭവം പുറത്തുവന്നതോടെ, പോലീസില്‍ നിന്ന് രക്ഷപ്പെടാന്‍ ശ്രമിച്ച പ്രതി ഫ്‌ലൈഓവറില്‍ നിന്ന് ചാടി രണ്ട് കാലുകളും ഒടിഞ്ഞു.

ഡിസംബര്‍ 13 നാണ് സംഭവം നടന്നത്. ഉത്തര്‍പ്രദേശിലെ സീതാപൂരില്‍ താമസിക്കുന്ന 29 കാരനായ സര്‍വേഷ്, മനേസറിനടുത്തുള്ള ഒരു ഗ്രാമത്തിലെ വയലില്‍ കളിച്ചുകൊണ്ടിരുന്ന ആറ്, എട്ട് വയസ്സുള്ള രണ്ട് സഹോദരിമാരെ പ്രലോഭിപ്പിച്ച് തന്റെ ഓട്ടോറിക്ഷയില്‍ കയറ്റി. 

പ്രതി കുട്ടികളെ ചോക്ലേറ്റ് നല്‍കി വശീകരിച്ച് ഓട്ടോറിക്ഷയില്‍ കയറ്റി. തുടര്‍ന്ന് രണ്ട് പെണ്‍കുട്ടികളെയും ആളൊഴിഞ്ഞ സ്ഥലത്തേക്ക് കൊണ്ടുപോയി.

അവിടെ വെച്ച് അയാള്‍ മൂത്ത കുട്ടിയെ ബലാത്സംഗം ചെയ്തു, ഇളയ കുട്ടിയെ ഓട്ടോറിക്ഷയില്‍ ഇരുത്തി. ഇതിനിടെ, ചില നാട്ടുകാര്‍ പ്രതിയെ പെണ്‍കുട്ടികളോടൊപ്പം കാണുകയും സംശയം തോന്നി ഒച്ചയെടുക്കുകയും ചെയ്തു. ശബ്ദം ഉയര്‍ന്നയുടനെ പ്രതി സംഭവസ്ഥലത്ത് നിന്ന് ഓടി രക്ഷപ്പെട്ടു. വിവരം ലഭിച്ചയുടനെ പോലീസ് സ്ഥലത്തെത്തി രണ്ട് സഹോദരിമാരെയും രക്ഷപ്പെടുത്തി.

സംഭവത്തെത്തുടര്‍ന്ന് മനേസര്‍ പോലീസ് സ്റ്റേഷനിലെയും ക്രൈംബ്രാഞ്ചിലെയും സംഘങ്ങള്‍ സംയുക്ത അന്വേഷണം ആരംഭിച്ചു. പ്രതി കസാന്‍ ഗ്രാമത്തില്‍ ഒറ്റയ്ക്കാണ് താമസിക്കുന്നതെന്ന് പോലീസിന് മനസ്സിലായി. തിങ്കളാഴ്ച സര്‍വേഷ് ഗുരുഗ്രാമില്‍ നിന്ന് രക്ഷപ്പെടാന്‍ പദ്ധതിയിടുന്നതായി പോലീസിന് വിവരം ലഭിച്ചു. പച്ച്ഗാവിനടുത്ത് ബസ് കാത്തുനില്‍ക്കുന്നത് പോലീസ് കണ്ടു.

പോലീസിനെ കണ്ടയുടനെ പ്രതി പരിഭ്രാന്തനായി ഫ്‌ലൈഓവറില്‍ നിന്ന് ചാടി രക്ഷപെടാന്‍ ശ്രമിച്ചു. സംഭവത്തില്‍ രണ്ട് കാലുകള്‍ക്കും ഗുരുതരമായ ഒടിവുകള്‍ സംഭവിച്ചു. ഇയാളെ ആശുപത്രിയില്‍ പ്രവേശിപ്പിച്ചിരിക്കുകയാണ്.