ഒരു കോഴിയെ കൊന്നതിന് പ്രതികാരം ചെയ്യാന്‍ എട്ട് നായ്ക്കള്‍ക്ക് വിഷം കൊടുത്തു, മൂന്നെണ്ണം ചത്തു. പോലീസ് സ്റ്റേഷൻ ഘെരാവോ ചെയ്ത് മൃഗസ്‌നേഹികൾ

ബേണ്‍പൂര്‍: ബംഗാളിലെ അസന്‍സോളില്‍ ഒരു യുവാവ് തന്റെ കോഴിയുടെ മരണത്തിന് പ്രതികാരം ചെയ്യാന്‍ എട്ട് നായ്ക്കളെ വിഷം കൊടുത്ത് കൊല്ലാന്‍ ശ്രമിച്ചു.

വികാസ് മണ്ഡല്‍ എന്ന യുവാവിന്റെ കോഴിയെ ഒരു തെരുവ് നായ കൊന്നു. തുടര്‍ന്ന് വികാസ് നായ്ക്കളെ വിഷം കൊടുത്ത് കൊല്ലാന്‍ പദ്ധതിയിടുകയായിരുന്നു. വെള്ളിയാഴ്ച രാത്രി വികാസ് ഭക്ഷണത്തില്‍ വിഷം കലര്‍ത്തി നായ്ക്കള്‍ക്ക് നല്‍കി.

തുടര്‍ന്ന് മൂന്ന് നായ്ക്കള്‍ സംഭവസ്ഥലത്ത് തന്നെ ചത്തു. മറ്റ് രണ്ട് നായ്ക്കളുടെ നില ഗുരുതരമായി തുടരുകയാണ്, മൂന്ന് നായ്ക്കളെ കാണാനില്ല.

സംഭവത്തെക്കുറിച്ച് പ്രാദേശിക മൃഗസ്നേഹിയായ സുമിത് ഹിരാപൂര്‍ പോലീസ് സ്റ്റേഷനിലും അസന്‍സോള്‍-ദുര്‍ഗാപൂര്‍ പോലീസ് കമ്മീഷണറിലും വിവരമറിയിച്ചിട്ടുണ്ട്. പ്രതികാരമായാണ് വികാസ് ഈ പ്രവൃത്തി ചെയ്തതെന്ന് സുമിത് ആരോപിച്ചു.

എല്ലാ നായ്ക്കളെയും കൊല്ലുമെന്ന് വികാസ് ഭീഷണിപ്പെടുത്തിയിരുന്നുവെന്ന് അദ്ദേഹം പറഞ്ഞു. സംഭവത്തിന് ശേഷം രോഷാകുലരായ മൃഗസ്‌നേഹികള്‍ ഹിരാപൂര്‍ പോലീസ് സ്റ്റേഷന്‍ ഘെരാവോ ചെയ്യുകയും പ്രതിയെ ഉടന്‍ അറസ്റ്റ് ചെയ്യണമെന്ന് ആവശ്യപ്പെടുകയും ചെയ്തു.

പരാതിയുടെ അടിസ്ഥാനത്തില്‍ അന്വേഷണം ആരംഭിച്ചതായും പ്രതിയെ അറസ്റ്റ് ചെയ്യാന്‍ ആവശ്യമായ നടപടി സ്വീകരിച്ചുവരികയാണെന്നും ഹിരാപൂര്‍ പോലീസ് സ്റ്റേഷന്‍ ഇന്‍ ചാര്‍ജ് പറഞ്ഞു.