മധ്യപ്രദേശിൽ പരീക്ഷ എഴുതാതിരിക്കാൻ പ്രിൻസിപ്പലിന്റെ മരണം വ്യാജമായി സൃഷ്ടിച്ച് വിദ്യാർത്ഥികൾ

ഡല്‍ഹി: മധ്യപ്രദേശില്‍ പരീക്ഷ എഴുതാതിരിക്കാന്‍ പ്രിന്‍സിപ്പലിന്റെ മരണം വ്യാജമായി സൃഷ്ടിച്ച് വിദ്യാര്‍ത്ഥികള്‍. മധ്യപ്രദേശില്‍ നിന്നുള്ള രണ്ട് ബിസിഎ വിദ്യാര്‍ത്ഥികളാണ് അവരുടെ പ്രിന്‍സിപ്പലിന്റെ മരണം വ്യാജമായി അവതരിപ്പിച്ചത്.

ഇന്‍ഡോറിലെ ഗവണ്‍മെന്റ് ഹോള്‍ക്കര്‍ സയന്‍സ് കോളേജിലെ രണ്ട് വിദ്യാര്‍ത്ഥികള്‍ അവരുടെ പ്രിന്‍സിപ്പല്‍ ഡോ. അനാമിക ജെയിനിന്റെ വ്യാജ മരണവാര്‍ത്ത സോഷ്യല്‍ മീഡിയയില്‍ പ്രചരിപ്പിക്കുകയായിരുന്നു.

വ്യാജ കോളേജ് ലെറ്റര്‍ഹെഡില്‍ തയ്യാറാക്കിയ വ്യാജ കത്ത് വൈറലായതോടെ പ്രകോപനവും ആശയക്കുഴപ്പവും പ്രിന്‍സിപ്പലിന്റെ വീട്ടിലേക്ക് അനുശോചന സന്ദേശങ്ങളും എത്തി.

പോലീസ് റിപ്പോര്‍ട്ടുകള്‍ പ്രകാരം, ഒക്ടോബര്‍ 15, 16 തീയതികളില്‍ നടക്കാനിരുന്ന തുടര്‍ച്ചയായ സമഗ്ര മൂല്യനിര്‍ണ്ണയം (സിസിഇ) പരീക്ഷകള്‍ തടസ്സപ്പെടുത്താന്‍ രണ്ട് മൂന്നാം സെമസ്റ്റര്‍ ബിസിഎ വിദ്യാര്‍ത്ഥികള്‍ ഗൂഢാലോചന നടത്തി. 

ചൊവ്വാഴ്ച രാത്രി 10:15 ഓടെ, 'പ്രിന്‍സിപ്പല്‍ ഡോ. അനാമിക ജെയിനിന്റെ പെട്ടെന്നുള്ള വിയോഗം കാരണം' കോളേജിലെ ഓണ്‍ലൈന്‍ പരീക്ഷകളും ക്ലാസുകളും മാറ്റിവയ്ക്കുകയാണെന്ന സന്ദേശം അവര്‍ പ്രചരിപ്പിക്കുകയായിരുന്നു.