ബിഹാർ ഉപമുഖ്യമന്ത്രിയുടെ വാഹനവ്യൂഹത്തിന് നേരെ വോട്ടെടുപ്പ് ദിവസം ആക്രമണം

പാറ്റ്ന: ബീഹാറിലെ ലഖിസരായ് ജില്ലയിൽ വോട്ടെടുപ്പ് ദിവസം ഉപമുഖ്യമന്ത്രി വിജയ് കുമാർ സിൻഹയുടെ വാഹനവ്യൂഹത്തിന് നേരെ അജ്ഞാതരായ ചിലർ കല്ലുകളും ചെരിപ്പുകളും എറിഞ്ഞു. 

 ആക്രമണത്തിന് പിന്നിൽ രാഷ്ട്രീയ ജനതാദൾ (ആർജെഡി) ആണെന്ന് ബിജെപി ആരോപിച്ചു.

ബിഹാർ നിയമസഭാ തെരഞ്ഞെടുപ്പിൽ ലഖിസരായ് സീറ്റിൽ നിന്ന് മത്സരിക്കുന്ന സിൻഹ, ഖോരിയാരി ഗ്രാമത്തിലേക്കുള്ള തന്റെ സന്ദർശനം തടയാൻ ശ്രമിച്ച ആർജെഡി അനുയായികളാണ് ആക്രമണം നടത്തിയതെന്ന് അവകാശപ്പെട്ടു.

"ഇവർ ആർജെഡിയുടെ ഗുണ്ടകളാണ്. എൻഡിഎ വീണ്ടും അധികാരത്തിൽ വരുമെന്ന് അവർക്കറിയാം, അതുകൊണ്ടാണ് അവർ ഗുണ്ടായിസം നടത്തിയത്. അവർ എന്റെ പോളിംഗ് ഏജന്റിനെ പിന്തിരിപ്പിച്ചു, വോട്ട് ചെയ്യാൻ അനുവദിച്ചില്ല. ഖോറിയാരിയിലെ 404, 405 ബൂത്തുകളിലെ അവരുടെ പെരുമാറ്റം നോക്കൂ," സിൻഹ വാർത്താ ഏജൻസിയായ എഎൻഐയോട് പറഞ്ഞു.