ചിക്കൻ ഫ്രൈ കുറച്ചേ വിളമ്പുന്നുള്ളുവെന്ന് വരന്‍റെ കുടുംബക്കാര്‍. കൂട്ടത്തല്ലിൽ പരിക്കേറ്റത് 15 പേര്‍ക്ക്

ബിജ്നോര്‍: ഉത്തര്‍പ്രദേശിലെ ബിജ്നോര്‍ ജില്ലയിൽ നടന്ന വിവാഹത്തിൽ വില്ലനായി ചിക്കൻ ഫ്രൈ.

നിക്കാഹ് ചടങ്ങിനിടെ വരന്‍റെ ഭാഗത്ത് നിന്നുള്ള അതിഥികൾ ആവശ്യത്തിന് ചിക്കൻ ഫ്രൈ ലഭിക്കുന്നില്ലെന്ന് പരാതിപ്പെട്ടതോടെയാണ് തര്‍ക്കം തുടങ്ങിയത്.

വധുവിന്‍റെ കുടുംബം ചെറിയ അളവിലാണ് ചിക്കൻ ഫ്രൈ വിളമ്പുന്നതെന്നായിരുന്നു പരാതി.

ഇതോടെ രംഗം ശാന്തമാക്കാൻ വധുവിന്‍റെ വീട്ടുകാര്‍ കൂടുതൽ ചിക്കൻ ഫ്രൈ കഷണങ്ങൾ കൊണ്ടുവന്ന് അതിഥികൾക്ക് വിളമ്പി. 

എന്നാൽ ഇതിൽ തൃപ്തരാകാത്ത വരന്‍റെ ബന്ധുക്കൾ മാന്യമായിട്ടല്ല ഭക്ഷണം വിളമ്പുന്നതെന്ന് അടുത്ത ആരോപണം ഉന്നയിച്ചു. ഇത് വധുവിന്‍റെ വീട്ടുകാരെ പ്രകോപിപ്പിച്ചു.

താമസിയാതെ, തർക്കം നിയന്ത്രണാതീതമായി. വാക്കുതർക്കത്തിൽ നിന്ന് കയ്യാങ്കളിയിലേക്ക് മാറി.

പരസ്പരം ഉന്തും തള്ളുമായി. 15 പേര്‍ക്ക് പരിക്കേറ്റു. ഇവരെ ആശുപത്രിയിൽ പ്രവേശിപ്പിച്ചിട്ടുണ്ട്.