/sathyam/media/agency_attachments/5VspLzgrB7PML1PH6Ix6.png)
Follow Us/sathyam/media/media_files/2026/02/17/untitled-2026-02-17-16-02-31.jpg)
ഡല്ഹി: ഡല്ഹിയില് നടക്കുന്ന 'ഇന്ത്യ എഐ ഇംപാക്ട് സമ്മിറ്റ് 2026'-ല് മൈക്രോസോഫ്റ്റ് സഹസ്ഥാപകന് ബില് ഗേറ്റ്സ് പങ്കെടുക്കില്ലെന്ന തരത്തില് പ്രചരിച്ച വാര്ത്തകള് ഗേറ്റ്സ് ഫൗണ്ടേഷന് നിഷേധിച്ചു.
അദ്ദേഹം ഉച്ചകോടിയില് പങ്കെടുക്കുമെന്നും നിശ്ചയിച്ച പ്രകാരം മുഖ്യപ്രഭാഷണം നടത്തുമെന്നും ഫൗണ്ടേഷന് വക്താവ് ചൊവ്വാഴ്ച വ്യക്തമാക്കി.
ഉച്ചകോടിയുടെ ഔദ്യോഗിക വെബ്സൈറ്റിലെ സ്പീക്കര്മാരുടെ പട്ടികയില് നിന്ന് ബില് ഗേറ്റ്സിന്റെ പേര് താത്കാലികമായി അപ്രത്യക്ഷമായതാണ് അദ്ദേഹത്തിന്റെ സന്ദര്ശനം റദ്ദാക്കിയെന്ന തരത്തിലുള്ള അഭ്യൂഹങ്ങള്ക്ക് കാരണമായത്. എന്നാല് ഇത്തരം പ്രചാരണങ്ങളില് അടിസ്ഥാനമില്ലെന്ന് ഫൗണ്ടേഷന് അറിയിച്ചു.
ഫെബ്രുവരി 19, 20 തീയതികളില് ഡല്ഹിയിലെ ഭാരത് മണ്ഡപത്തിലാണ് ഉച്ചകോടി നടക്കുന്നത്. പ്രധാനമന്ത്രി നരേന്ദ്ര മോദി ഉച്ചകോടി ഉദ്ഘാടനം ചെയ്യും.
ബില് ഗേറ്റ്സിന് പുറമെ ആല്ഫബെറ്റ് സിഇഒ സുന്ദര് പിച്ചൈ, ഓപ്പണ് എഐ സിഇഒ സാം ആള്ട്ട്മാന് തുടങ്ങിയ ആഗോള ടെക് ലോകത്തെ പ്രമുഖര് ഉച്ചകോടിയുടെ ഭാഗമാകും.
മുപ്പതിലധികം രാജ്യങ്ങളില് നിന്നുള്ള പ്രതിനിധികള് പങ്കെടുക്കുന്ന ഈ സംഗമത്തില് ആഗോളതലത്തിലെ എഐ നിയന്ത്രണങ്ങള്, ഭരണക്രമം, അന്താരാഷ്ട്ര സഹകരണം എന്നിവയാണ് പ്രധാനമായും ചര്ച്ച ചെയ്യുന്നത്.