'മെമ്പര്‍ഷിപ്പ് ഡ്രൈവി'നൊരുങ്ങി ബിജെപി; പുതിയതായി പാര്‍ട്ടിയില്‍ ചേര്‍ക്കാന്‍ ലക്ഷ്യമിടുന്നത് 10 കോടി പേരെ ! കാമ്പെയ്ന്‍ സെപ്തംബര്‍ ഒന്ന് മുതല്‍; അംഗത്വം മിസ് കോള്‍ വഴിയും

ന്യൂഡല്‍ഹി: തിരഞ്ഞെടുപ്പ് നടക്കുന്ന സംസ്ഥാനങ്ങളും കേന്ദ്രഭരണ പ്രദേശങ്ങളും ഒഴികെയുള്ള എല്ലാ സംസ്ഥാനങ്ങളിലും സെപ്റ്റംബർ 1 മുതൽ ആരംഭിക്കുന്ന മെമ്പർഷിപ്പ് ഡ്രൈവിൻ്റെ ഭാഗമായി കുറഞ്ഞത് 10 കോടി പുതിയ അംഗങ്ങളെ ചേര്‍ക്കാന്‍ ലക്ഷ്യമിട്ട് ബിജെപി.

ശനിയാഴ്ച ചേർന്ന പാർട്ടി ദേശീയ-സംസ്ഥാന ഭാരവാഹികളുടെ യോഗത്തിലാണ് തീരുമാനം. പുതിയ പാർട്ടി മേധാവിയെ തിരഞ്ഞെടുക്കുന്നതിന് മുന്നോടിയായാണ് മെമ്പര്‍ഷിപ്പ് ഡ്രൈവ് സംഘടിപ്പിക്കുന്നത്.

പാർട്ടി അധ്യക്ഷനും കേന്ദ്ര ആരോഗ്യമന്ത്രിയുമായ ജെപി നദ്ദ, കേന്ദ്ര ആഭ്യന്തര മന്ത്രി അമിത് ഷാ, വിവിധ സംസ്ഥാനങ്ങളിലെ പ്രസിഡൻ്റുമാരും ഭാരവാഹികളും പാർട്ടിയുടെ മുതിർന്ന നേതാക്കളും യോഗത്തിൽ പങ്കെടുത്തു. ദേശീയ ജനറൽ സെക്രട്ടറി വിനോദ് താവ്‌ഡെയാണ് അംഗത്വ നടപടികൾക്ക് മേൽനോട്ടം വഹിക്കുക.

അംഗത്വ ഡ്രൈവ് സെപ്തംബർ 1 മുതൽ നവംബർ 10 വരെ ഘട്ടങ്ങളായി നടക്കുമെന്നും മിസ്ഡ് കോൾ, പാർട്ടിയുടെ വെബ്‌സൈറ്റ്, മറ്റ് ഡിജിറ്റൽ പ്ലാറ്റ്‌ഫോമുകൾ എന്നിവയിലൂടെ സൈൻ അപ്പ് ചെയ്യാൻ വ്യക്തികളെ അനുവദിക്കുമെന്നും പാർട്ടി വക്താവ്‌ സംബിത് പത്ര പറഞ്ഞു.

വിവിധ സംസ്ഥാനങ്ങളിലെയും കേന്ദ്ര ഭരണ പ്രദേശങ്ങളിലെയും ഡ്രൈവ് മേൽനോട്ടം വഹിക്കാൻ പാർട്ടി നേതാക്കളെ ചുമതലക്കാരായി നിയോഗിച്ചിട്ടുണ്ട്. രാജസ്ഥാൻ, മധ്യപ്രദേശ്, ഗോവ, ദാമൻ ദിയു, ദാദ്ര നഗർ ഹവേലി എന്നിവിടങ്ങളിലെ ചുമതലയാണ് താവ്‌ഡേയ്ക്കുള്ളത്.

ദേശീയ ജനറൽ സെക്രട്ടറി ദുഷ്യന്ത് ഗൗതം പശ്ചിമ ബംഗാൾ, സിക്കിം, ത്രിപുര, ഒഡീഷ എന്നിവിടങ്ങളിലെ പ്രവർത്തനങ്ങൾക്ക് മേൽനോട്ടം വഹിക്കും. ദേശീയ വൈസ് പ്രസിഡൻ്റ് രേഖ വർമ്മ ഡൽഹി, ഹിമാചൽ പ്രദേശ്, പഞ്ചാബ്, ലഡാക്ക്, ചണ്ഡീഗഡ് എന്നിവിടങ്ങളിലെ പ്രചാരണം കൈകാര്യം ചെയ്യും.

ആന്ധ്രാപ്രദേശ് സംസ്ഥാന പ്രസിഡൻ്റ് ഡി പുരന്ദേശ്വരിക്ക് കേരളം, പുതുച്ചേരി, തമിഴ്നാട് എന്നിവയുടെ ചുമതലയുണ്ട്. ആൻഡമാൻ നിക്കോബാർ, ആന്ധ്രാപ്രദേശ്, ലക്ഷദ്വീപ്, തെലങ്കാന എന്നീ സംസ്ഥാനങ്ങളുടെ ചുമതല ദേശീയ സെക്രട്ടറി അരവിന്ദ് മേനോനാണ്.

അരുണാചൽ പ്രദേശ്, അസം, മണിപ്പൂർ, മേഘാലയ, മിസോറാം, നാഗാലാൻഡ് എന്നീ സംസ്ഥാനങ്ങളില്‍ രാജ്ദീപ് റോയിക്കാണ് ചുമതല. ദേശീയ സെക്രട്ടറി വിജയ രഹത്കർ ഛത്തീസ്ഗഢിൻ്റെയും കർണാടകയുടെയും മേൽനോട്ടം വഹിക്കും.

ദേശീയ സെക്രട്ടറി ഋതുരാജ് സിൻഹ ഉത്തർപ്രദേശിലെയും ഗുജറാത്തിലെയും പ്രചാരണത്തിന് മേൽനോട്ടം വഹിക്കുമെന്നും ഗാസിയാബാദ് എംപി അതുൽ ഗാർഗിന് ഉത്തരാഖണ്ഡിൻ്റെയും ബിഹാറിൻ്റെയും ചുമതലയുണ്ടാകുമെന്നാണ് റിപ്പോര്‍ട്ട്.

മെമ്പർഷിപ്പ് ഡ്രൈവ് പ്രക്രിയ സംസ്ഥാനങ്ങളിലെ സംഘടനാ നിയമനങ്ങളിലേക്ക് നയിക്കും. ഇത് പുതിയ പാർട്ടി മേധാവിയെ തിരഞ്ഞെടുക്കുന്നതിന് കളമൊരുക്കും. നദ്ദയുടെ കാലാവധി ഈ വർഷം ജനുവരിയിൽ അവസാനിച്ചെങ്കിലും പുതിയ പാർട്ടി അധ്യക്ഷനെ തിരഞ്ഞെടുക്കുന്നത് വരെ പദവിയിൽ തുടരും.