എനിക്ക് ഇവിടെ കാത്തിരിക്കാന്‍ കഴിയില്ല. കഴിഞ്ഞ 72 മണിക്കൂറായി അദ്ദേഹവുമായി യാതൊരു ബന്ധവുമില്ല. ഞാന്‍ ഡല്‍ഹിയില്‍ പോയി പ്രധാനമന്ത്രിയുടെ ഓഫീസില്‍ നിന്ന് ഉത്തരം തേടും. പാകിസ്ഥാന്‍ പുറത്തുവിട്ട കണ്ണുകള്‍ കെട്ടിയിരിക്കുന്ന ചിത്രം കണ്ടതിനുശേഷം എന്റെ ആശങ്ക വര്‍ദ്ധിച്ചു. അബദ്ധത്തില്‍ അതിര്‍ത്തി കടന്ന ബിഎസ്എഫ് ജവാന്റെ ഗര്‍ഭിണിയായ ഭാര്യ പറയുന്നു

ചണ്ഡീഗഢ്: പാകിസ്ഥാനുമായുള്ള അന്താരാഷ്ട്ര അതിര്‍ത്തിയില്‍ നിയോഗിക്കപ്പെട്ട ബിഎസ്എഫ് ജവാന്‍ പൂര്‍ണം കുമാര്‍ ഷാ ബുധനാഴ്ച അബദ്ധത്തില്‍ പാകിസ്ഥാനില്‍ പ്രവേശിച്ചു.

പാകിസ്ഥാന്‍ റേഞ്ചേഴ്സ് അദ്ദേഹത്തെ കസ്റ്റഡിയിലെടുത്തു. തങ്ങളുടെ സൈനികനെ തിരികെ കൊണ്ടുവരണമെന്ന് ബിഎസ്എഫ് ആവശ്യപ്പെട്ടിട്ടുണ്ട്. ബുധനാഴ്ച ഡ്യൂട്ടിയിലിരിക്കെ അതിര്‍ത്തി കടന്നതിനാണ് പാകിസ്ഥാന്‍ റേഞ്ചേഴ്സ് പൂര്‍ണത്തെ കസ്റ്റഡിയിലെടുത്തത്.

അതേസമയം, മുതിര്‍ന്ന ഉദ്യോഗസ്ഥരില്‍ നിന്ന് ഭര്‍ത്താവിനെക്കുറിച്ച് ആശ്വാസകരമായ ഒരു വാര്‍ത്തയും ലഭിക്കാത്തതില്‍ പൂര്‍ണം കുമാര്‍ ഷായുടെ ഭാര്യ രജനി ഉത്തരങ്ങള്‍ തേടി ഫിറോസ്പൂരിലേക്ക് പോകുമെന്ന് പറഞ്ഞു.

എനിക്ക് ഇവിടെ കാത്തിരിക്കാന്‍ കഴിയില്ല. കഴിഞ്ഞ 72 മണിക്കൂറായി എനിക്ക് അദ്ദേഹവുമായി യാതൊരു ബന്ധവുമില്ല. അവിടെ നിന്ന് സഹായം ലഭിച്ചില്ലെങ്കില്‍, ഞാന്‍ ഡല്‍ഹിയില്‍ പോയി പ്രധാനമന്ത്രിയുടെ ഓഫീസില്‍ നിന്ന് ഉത്തരം തേടും.

പാകിസ്ഥാന്‍ പുറത്തുവിട്ട പൂര്‍ണത്തിന്റെ കണ്ണുകള്‍ കെട്ടിയിരിക്കുന്ന ചിത്രം കണ്ടതിനുശേഷം തന്റെ ആശങ്ക വര്‍ദ്ധിച്ചുവെന്ന് അവര്‍ പറഞ്ഞു.

പൂര്‍ണം കുമാര്‍ ഷായുടെ അമ്മ ദേവന്തി ദേവിയും തന്റെ ദുഃഖം പ്രകടിപ്പിച്ചു. എന്റെ മകന്‍ സുരക്ഷിതമായി തിരിച്ചുവരണമെന്നാണ് എന്റെ ആഗ്രഹം എന്ന് അവര്‍ പറഞ്ഞു.