ആസാമില്‍ മന്ത്രവാദം നടത്തിയെന്ന് ആരോപിച്ച് ഗ്രാമവാസികള്‍ ദമ്പതികളെ ജീവനോടെ തീകൊളുത്തി കൊന്നു

ഡല്‍ഹി: ആസാമില്‍ മന്ത്രവാദം നടത്തിയെന്ന് ആരോപിച്ച് ഗ്രാമവാസികള്‍ ദമ്പതികളെ ക്രൂരമായി കൊലപ്പെടുത്തി. ചൊവ്വാഴ്ച കര്‍ബി ആംഗ്ലോങ് ജില്ലയിലെ ഹൗരാഗട്ട് പ്രദേശത്തെ നമ്പര്‍ 1 ബെലോഗുരി മുണ്ട ഗ്രാമത്തിലാണ് സംഭവം.

കൊല്ലപ്പെട്ടത് 43 വയസ്സുള്ള ഗാര്‍ഡി ബിറോവയും 33 വയസ്സുള്ള ഭാര്യ മീര ബിറോവയുമാണ്. റിപ്പോര്‍ട്ടുകള്‍ പ്രകാരം ഒരു സംഘം ഗ്രാമവാസികള്‍ ദമ്പതികളുടെ വീട്ടില്‍ കയറി മൂര്‍ച്ചയുള്ള ആയുധങ്ങള്‍ ഉപയോഗിച്ച് അവരെ ആക്രമിച്ചു. ആക്രമണത്തിന് ശേഷം അക്രമികള്‍ വീടിന് തീയിട്ടു. ഇരുവരെയും വീട്ടിനുള്ളില്‍ ജീവനോടെ ചുട്ടുകൊന്നു.

സംഭവം നടന്നയുടനെ പോലീസ് ഉദ്യോഗസ്ഥര്‍ സ്ഥലത്തെത്തി അന്വേഷണം ആരംഭിച്ചു. ആക്രമണത്തില്‍ ഉള്‍പ്പെട്ട എല്ലാ പ്രതികളെയും അറസ്റ്റ് ചെയ്തിട്ടുണ്ട്. അക്രമത്തിലേക്ക് നയിച്ചത് എന്താണെന്ന് മനസ്സിലാക്കാന്‍ പോലീസ് ഇപ്പോള്‍ അവരെ ചോദ്യം ചെയ്യുകയാണ്.

കുറ്റകൃത്യം നടന്ന പ്രദേശം അന്ധവിശ്വാസത്താല്‍ ബാധിക്കപ്പെട്ടിട്ടുണ്ടെന്ന് ഒരു പോലീസ് ഉദ്യോഗസ്ഥന്‍ വാര്‍ത്താ ഏജന്‍സിയായ പിടിഐയോട് പറഞ്ഞു.