കാൻസറിനെ ദേശീയ രോഗമായി പ്രഖ്യാപിക്കണം: കേന്ദ്രത്തിനും സംസ്ഥാനങ്ങൾക്കും സുപ്രീം കോടതിയുടെ നോട്ടീസ്

ഡല്‍ഹി: കാന്‍സറിനെ ദേശീയ രോഗമായി രാജ്യവ്യാപകമായി വിജ്ഞാപനം ചെയ്യണമെന്ന് ആവശ്യപ്പെട്ടുള്ള ഹര്‍ജിയില്‍ സുപ്രീം കോടതി കേന്ദ്രത്തിനും സംസ്ഥാന സര്‍ക്കാരുകള്‍ക്കും കേന്ദ്രഭരണ പ്രദേശങ്ങള്‍ക്കും നോട്ടീസ് അയച്ചു. 

കാന്‍സര്‍ മാനേജ്‌മെന്റിനായുള്ള ഇന്ത്യയുടെ പൊതുജനാരോഗ്യ അടിസ്ഥാന സൗകര്യങ്ങളിലെ ഗുരുതരമായ വിടവുകള്‍ കോടതി ചൂണ്ടിക്കാണിച്ചു. ജനസംഖ്യയുടെ ഏകദേശം 90% പേരും വ്യവസ്ഥാപിതവും പതിവുള്ളതുമായ കാന്‍സര്‍ നിരീക്ഷണത്തിന് പുറത്താണെന്ന് കോടതി ചൂണ്ടിക്കാട്ടി.

എയിംസില്‍ നിന്ന് വിരമിച്ച കാന്‍സര്‍ സ്‌പെഷ്യലിസ്റ്റ് ഡോ. അനുരാഗ് ശ്രീവാസ്തവ സമര്‍പ്പിച്ച പൊതുതാല്‍പര്യ ഹര്‍ജി പരിഗണിക്കുന്നതിനിടെയാണ് ചീഫ് ജസ്റ്റിസ് സൂര്യകാന്ത് അധ്യക്ഷനായ ബെഞ്ച് നോട്ടീസ് അയച്ചത്. 

ഉന്നയിച്ച വിഷയങ്ങളില്‍ കേന്ദ്ര ആരോഗ്യ കുടുംബക്ഷേമ മന്ത്രാലയം, സംസ്ഥാനങ്ങള്‍, കേന്ദ്രഭരണ പ്രദേശങ്ങള്‍ എന്നിവയില്‍ നിന്ന് ബെഞ്ച് ഔദ്യോഗിക പ്രതികരണങ്ങള്‍ തേടി.