രാജ്യത്തെ ഏറ്റവും വലിയ ബാങ്ക് വായ്പാ തട്ടിപ്പ്: 34,000 കോടി രൂപയുടെ ഡിഎച്ച്എഫ്എൽ കേസില്‍ മുന്‍ ഡയറക്ടര്‍ ധീരജ് വാധവാനെ അറസ്റ്റ് ചെയ്ത് സിബിഐ

ന്യൂഡല്‍ഹി: 34,000 കോടി രൂപയുടെ ഡിഎച്ച്എഫ്എൽ ബാങ്ക് തട്ടിപ്പ് അന്വേഷണത്തിൽ ധീരജ് വാധവാനെ സെൻട്രൽ ബ്യൂറോ ഓഫ് ഇൻവെസ്റ്റിഗേഷൻ (സിബിഐ) അറസ്റ്റ് ചെയ്തു. യെസ് ബാങ്ക് അഴിമതിക്കേസുമായി ബന്ധപ്പെട്ട് ധീരജ് വാധവാനെ നേരത്തെ പിടികൂടിയിരുന്നെങ്കിലും ജാമ്യം ലഭിച്ചിരുന്നു.

രാജ്യത്തെ ഏറ്റവും വലിയ ബാങ്കിംഗ് വായ്പ തട്ടിപ്പ് കേസാണ് ഇത്. 17 ബാങ്കുകളുടെ കൺസോർഷ്യത്തിൽ നിന്ന് 34,000 കോടി രൂപയുടെ തട്ടിപ്പ് നടത്തിയെന്നാണ് കേസ്. 

ഈ വർഷം ഫെബ്രുവരിയിൽ, സെക്യൂരിറ്റീസ് എക്‌സ്‌ചേഞ്ച് ബോർഡ് ഓഫ് ഇന്ത്യ (സെബി) 22 ലക്ഷം രൂപയുടെ കുടിശ്ശിക തിരിച്ചുപിടിക്കാൻ മുൻ ഡിഎച്ച്എഫ്എൽ പ്രമോട്ടർമാരായ ധീരജിൻ്റെയും കപിൽ വാധവൻ്റെയും ബാങ്ക് അക്കൗണ്ടുകളും ഓഹരികളും മ്യൂച്വൽ ഫണ്ട് ഹോൾഡിംഗുകളും അറ്റാച്ച്‌മെൻ്റ് ചെയ്യാൻ ഉത്തരവിട്ടിരുന്നു.

മാനദണ്ഡങ്ങൾ ലംഘിച്ചതുമായി ബന്ധപ്പെട്ട കേസിൽ കഴിഞ്ഞ വർഷം ജൂലൈയിൽ വാധവാൻ സഹോദരന്മാർ ചുമത്തിയ പിഴ അടയ്ക്കുന്നതിൽ പരാജയപ്പെട്ടതിനെ തുടർന്നായിരുന്നു മാർക്കറ്റ് റെഗുലേറ്ററുടെ നീക്കം.

കപിൽ വാധവാൻ ഡിഎച്ച്എഫ്എൽ ചെയർമാനും എംഡിയും ആയിരുന്നു. ധീരജ് വാധവാൻ കമ്പനിയുടെ നോൺ എക്സിക്യൂട്ടീവ് ഡയറക്ടറായിരുന്നു. ഇരുവരും ഡിഎച്ച്എഫ്എല്ലിൻ്റെ ബോർഡിലുണ്ടായിരുന്നു.