പഞ്ചാബില്‍ സോഫയില്‍ നിന്ന് എഴുന്നേല്‍ക്കുന്നതിനിടെ അബദ്ധത്തില്‍ തോക്ക് പൊട്ടി ഒരാള്‍ മരിച്ചു

ചണ്ഡീഗഢ്: പഞ്ചാബിലെ ഫിറോസ്പൂരില്‍ സോഫയില്‍ നിന്ന് എഴുന്നേല്‍ക്കുമ്പോള്‍ അരയില്‍ സൂക്ഷിച്ചിരുന്ന തോക്ക് അബദ്ധത്തില്‍ പൊട്ടി എന്‍ആര്‍ഐ മരിച്ചു. 

ഹര്‍പീന്ദര്‍ സിംഗ് എന്നയാളാണ് കൊല്ലപ്പെട്ടത്. തിങ്കളാഴ്ചയാണ് സംഭവം റിപ്പോര്‍ട്ട് ചെയ്തതെന്ന് പോലീസ് പറഞ്ഞു. വീടിനുള്ളില്‍ സ്ഥാപിച്ചിരുന്ന സിസിടിവി ക്യാമറകളില്‍ സംഭവം പതിഞ്ഞിട്ടുണ്ട്.

ഹര്‍പീന്ദര്‍ സിംഗ് ഒരു ബന്ധുവിനൊപ്പം സോഫയില്‍ ഇരിക്കുകയായിരുന്നു. എഴുന്നേല്‍ക്കുമ്പോള്‍ തോക്ക് അബദ്ധത്തില്‍ പൊട്ടി. വെടിയുണ്ട അദ്ദേഹത്തിന്റെ വയറ്റില്‍ തുളച്ചുകയറിയെന്നും പോലീസ് കൂട്ടിച്ചേര്‍ത്തു.

വെടിയൊച്ച കേട്ട് കുടുംബാംഗങ്ങള്‍ ഹര്‍പീന്ദറിന്റെ സഹായത്തിനെത്തുന്നതും മുറിയില്‍ നിന്ന് പുറത്തേക്ക് വരുന്നതും സിസിടിവി ദൃശ്യങ്ങളില്‍ കാണാം.

ഉടന്‍ തന്നെ അദ്ദേഹത്തെ ഒരു സര്‍ക്കാര്‍ ആശുപത്രിയിലേക്ക് കൊണ്ടുപോയി, അവിടെ ഡോക്ടര്‍മാര്‍ മറ്റൊരു ആശുപത്രിയിലേക്ക് റഫര്‍ ചെയ്തു, ബത്തിന്‍ഡയിലേക്ക് കൊണ്ടുപോകുന്നതിനിടെ അദ്ദേഹം മരിച്ചു.