കശ്മീരിലെ കുപ്വാര, ബാരാമുള്ള, പൂഞ്ച്, നൗഷേര, അഖ്‌നൂര്‍ പ്രദേശങ്ങളില്‍ പ്രകോപനമില്ലാതെ എട്ടാം രാത്രിയിലും വെടിനിര്‍ത്തല്‍ കരാര്‍ ലംഘിച്ച് പാകിസ്ഥാന്‍. തിരിച്ചടിച്ച് ഇന്ത്യന്‍ സൈന്യം

ഡല്‍ഹി: ജമ്മു കശ്മീരിലെ കുപ്വാര, ബാരാമുള്ള, പൂഞ്ച്, നൗഷേര, അഖ്‌നൂര്‍ പ്രദേശങ്ങളില്‍ പ്രകോപനമില്ലാതെ വെടിയുതിര്‍ത്ത് പാക് സൈന്യം.  

തുടര്‍ച്ചയായ എട്ടാം രാത്രിയാണ് വെടിനിര്‍ത്തല്‍ കരാര്‍ ലംഘനങ്ങള്‍ നടക്കുന്നത്. ഇന്ത്യന്‍ സൈന്യം ഉടന്‍ തിരിച്ചടിച്ചു.

ഏപ്രില്‍ 22 ലെ പഹല്‍ഗാം ഭീകരാക്രമണത്തെത്തുടര്‍ന്ന് ഇന്ത്യയും പാകിസ്ഥാനും തമ്മില്‍ വര്‍ദ്ധിച്ചുവരുന്ന സംഘര്‍ഷങ്ങള്‍ക്കിടയില്‍ നിയന്ത്രണ രേഖയില്‍ (എല്‍ഒസി) ആവര്‍ത്തിച്ചുള്ള ഈ ലംഘനങ്ങളെക്കുറിച്ച് ഇന്ത്യ പാകിസ്ഥാന് കര്‍ശന മുന്നറിയിപ്പ് നല്‍കിയിരുന്നു.

പാകിസ്ഥാന്‍ സൈന്യത്തിന്റെ പ്രകോപനമില്ലാതെയുള്ള വെടിനിര്‍ത്തല്‍ ലംഘനങ്ങള്‍ പരിഹരിക്കുന്നതിനായി ഇരു രാജ്യങ്ങളുടെയും ഡയറക്ടര്‍ ജനറല്‍ ഓഫ് മിലിട്ടറി ഓപ്പറേഷന്‍സ് (ഡിജിഎംഒ) ചൊവ്വാഴ്ച ഹോട്ട്ലൈന്‍ സംഭാഷണം നടത്തിയിരുന്നു.

വടക്കന്‍ കശ്മീരിലെ കുപ്വാര, ബാരാമുള്ള ജില്ലകളിലെ നിയന്ത്രണരേഖയിലെ നിരവധി പോസ്റ്റുകളില്‍ പ്രകോപനമില്ലാതെ വെടിയുതിര്‍ത്ത പാകിസ്ഥാന്‍ പിന്നീട് പൂഞ്ച് സെക്ടറിലേക്കും പിന്നീട് ജമ്മു മേഖലയിലെ അഖ്‌നൂര്‍ സെക്ടറിലേക്കും വെടിനിര്‍ത്തല്‍ ലംഘനം വ്യാപിപ്പിച്ചു.