ചൈതന്യാനന്ദയുടെ ഫോണിൽ നിന്ന് എയർ ഹോസ്റ്റസിന്റെ ചിത്രങ്ങൾ കണ്ടെത്തി; അന്വേഷണവുമായി സഹകരിക്കുന്നില്ലെന്ന് പോലീസ്

ഡല്‍ഹി: ഡല്‍ഹിയിലെ വസന്ത് കുഞ്ചിലുള്ള ശ്രീ ശാരദ ഇന്‍സ്റ്റിറ്റ്യൂട്ട് ഓഫ് ഇന്ത്യന്‍ മാനേജ്മെന്റ് ആന്‍ഡ് റിസര്‍ച്ചിലെ വിദ്യാര്‍ത്ഥിനികളെ പീഡിപ്പിച്ച കേസില്‍ അറസ്റ്റിലായ ചൈതന്യാനന്ദ സരസ്വതിയുടെ മൊബൈല്‍ ഫോണില്‍ നിന്ന് നിരവധി എയര്‍ ഹോസ്റ്റസുമാരുടെ ഫോട്ടോകള്‍ പോലീസ് കണ്ടെത്തി. ഈ എയര്‍ ഹോസ്റ്റസുമാരോടൊപ്പം ചൈതന്യാനന്ദ ഫോട്ടോ എടുത്തിരുന്നു.

പോലീസ് അന്വേഷണവുമായി അദ്ദേഹം സഹകരിക്കുന്നില്ലെന്ന് സൗത്ത് വെസ്റ്റ് ഡിസ്ട്രിക്റ്റ് ഡിസിപി പറഞ്ഞു. തന്റെ പ്രവൃത്തികളില്‍ അദ്ദേഹം പശ്ചാത്താപം കാണിക്കുന്നില്ല, ചോദ്യം ചെയ്യലില്‍ നിരന്തരം കള്ളം പറയുകയാണ്. അദ്ദേഹത്തിന്റെ രണ്ട് വനിതാ കൂട്ടാളികളെയും കസ്റ്റഡിയിലെടുത്തിട്ടുണ്ട്.

പോലീസ് പറയുന്നതനുസരിച്ച്, ഇയാളുടെ മൊബൈല്‍ ഫോണില്‍ നിന്ന് മറ്റ് നിരവധി പെണ്‍കുട്ടികളുമായുള്ള ചാറ്റുകള്‍ കണ്ടെത്തിയിട്ടുണ്ട്. ഈ ചാറ്റുകളില്‍, പെണ്‍കുട്ടികളെ കബളിപ്പിക്കാനും വശീകരിക്കാനും ശ്രമിക്കുന്നത് കാണാം.

നിരവധി എയര്‍ ഹോസ്റ്റസുമാരുമൊത്തുള്ള ഫോട്ടോകള്‍ ഇയാള്‍ എടുത്ത് തന്റെ ഫോണില്‍ സൂക്ഷിച്ചിരുന്നതായി റിപ്പോര്‍ട്ടുണ്ട്. നിരവധി പെണ്‍കുട്ടികളുടെ മൊബൈല്‍ ഫോണ്‍ ഡിപികളുടെ സ്‌ക്രീന്‍ഷോട്ടുകള്‍ ചൈത്യാനന്ദ സൂക്ഷിച്ചിരുന്നു.