ഞങ്ങൾ ജനാധിപത്യപരമായും മതേതരമായും പ്രവർത്തിക്കും. ആരുടെയും ആത്മാഭിമാനം കവർന്നെടുക്കില്ല, ഞങ്ങൾ എല്ലാവരും ഒരുമിച്ച് എല്ലാവർക്കും വേണ്ടി പ്രവർത്തിക്കും; ചന്ദ്രബാബു നായിഡു ഇന്ന് ആന്ധ്രാപ്രദേശ് മുഖ്യമന്ത്രിയായി സത്യപ്രതിജ്ഞ ചെയ്യും

വിജയവാഡ: ആന്ധ്രാപ്രദേശ് മുഖ്യമന്ത്രിയായി സത്യപ്രതിജ്ഞ ചെയ്യുന്നതിന് ഒരു ദിവസം മുമ്പായി അമരാവതി സംസ്ഥാന തലസ്ഥാനമാകുമെന്ന് പ്രഖ്യാപിച്ച് തെലുങ്ക് ദേശം പാർട്ടി അധ്യക്ഷൻ എൻ. ചന്ദ്രബാബു നായിഡു. വിജയവാഡയിൽ നടന്ന എൻഡിഎ നിയമസഭാ പാർട്ടി യോഗത്തിലാണ് അദ്ദേഹം ഇക്കാര്യം പ്രഖ്യാപിച്ചത്.

സഖ്യത്തിൻ്റെ നേതാവായി ചന്ദ്രബാബു നായിഡുവിനെ ഐകകണ്ഠേന തിരഞ്ഞെടുത്തിരുന്നു. ജനസേന പാർട്ടി അധ്യക്ഷൻ കെ. പവൻ കല്യാൺ ആണ് അദ്ദേഹത്തിന്റെ പേര് നിർദ്ദേശിച്ചത്. ഇതിനെ ബിജെപി സംസ്ഥാന പ്രസിഡൻ്റും പുതുതായി തിരഞ്ഞെടുക്കപ്പെട്ട എംപിയുമായ ഡി. പുരന്ദേശ്വരി പിന്തുണച്ചു.

“അമരാവതി നമ്മുടെ സംസ്ഥാനത്തിൻ്റെ തലസ്ഥാനമായിരിക്കും. ചില സ്ഥലങ്ങൾ മാത്രമല്ല, മുഴുവൻ സംസ്ഥാനവും വികസിപ്പിക്കാൻ ഞങ്ങൾ ലക്ഷ്യമിടുന്നു, ” ചന്ദ്രബാബു നായിഡു പറഞ്ഞു. 

ആന്ധ്രാപ്രദേശിൽ ടിഡിപി, ജെ.എസ്.പി, ബിജെപി എന്നീ പാർട്ടികൾ ഉൾപ്പെട്ട എൻഡിഎ മുന്നണി, ഒരേസമയം നടന്ന നിയമസഭാ, ലോക്‌സഭാ തിരഞ്ഞെടുപ്പുകളിൽ ഭരണകക്ഷിയായ വൈഎസ്ആർസിപിയെ സമ്പൂർണ്ണമായി പരാജയപ്പെടുത്തിയിരുന്നു. 

വിശാഖപട്ടണത്തെ ഭരണ തലസ്ഥാനമായി വികസിപ്പിക്കുമെന്നും അവിടെ സത്യപ്രതിജ്ഞ ചെയ്യുമെന്നും പറഞ്ഞ സ്ഥാനമൊഴിയുന്ന മുഖ്യമന്ത്രി വൈ.എസ്. ജഗൻമോഹൻ റെഡ്ഡിയെ പരിഹസിച്ച നായിഡു, വിശാഖപട്ടണത്ത് വൈഎസ്ആർസിപിയെ പരാജയപ്പെടുത്തി ജനങ്ങൾ ഈ ആശയത്തോട് പ്രതികരിച്ചുവെന്നും തിരിച്ചടിച്ചു. 

അമരാവതിയെ നിയമനിർമ്മാണ തലസ്ഥാനമായും, വിശാഖപട്ടണം ഭരണതലസ്ഥാനമായും, കർണൂലിനെ ജുഡീഷ്യൽ തലസ്ഥാനമാക്കുമെന്നും ചൂണ്ടിക്കാട്ടി, സംസ്ഥാനത്തിൻ്റെ വികേന്ദ്രീകൃത വികസനം എന്ന ആശയം ജഗൻമോഹൻ റെഡ്ഡി അവതരിപ്പിച്ചിരുന്നു. മുൻ ഭരണകാലത്ത് കുറ്റകൃത്യങ്ങൾ ചെയ്തവർ നിയമത്തിൻ്റെ മുന്നിൽ വരുമെന്നും അദ്ദേഹം പറഞ്ഞു.

“ഞങ്ങൾ ജനാധിപത്യപരമായും മതേതരമായും പ്രവർത്തിക്കും. ആരുടെയും ആത്മാഭിമാനം കവർന്നെടുക്കില്ല. ഞങ്ങൾ എല്ലാവരും ഒരുമിച്ച് എല്ലാവർക്കും വേണ്ടി പ്രവർത്തിക്കും,” ചൊവ്വാഴ്ചത്തെ യോഗത്തിൽ ചന്ദ്രബാബു നായിഡു പറഞ്ഞു.

"സംസ്ഥാനം ആദ്യം, എന്നതായിരിക്കും സർക്കാരിൻ്റെ മുദ്രാവാക്യം. സർക്കാരിന്റെ സാമ്പത്തിക സ്ഥിതി എന്താണെന്ന് ഞങ്ങൾക്കറിയില്ല. നമ്മുടെ സംസ്ഥാനത്തിൻ്റെ കടം എന്താണെന്നും എവിടെ നിന്നാണ് പണം കടം വാങ്ങിയതെന്നും എന്താണ് പണയപ്പെടുത്തിയതെന്നും ഞങ്ങൾക്ക് അറിയില്ല.

 'സംസ്ഥാനം ആദ്യം' എന്ന മുദ്രാവാക്യവുമായി ഞങ്ങൾ പ്രവർത്തിക്കും, സർവതോന്മുഖമായ വികസനം ലക്ഷ്യമിടുന്നു," നായിഡു പറഞ്ഞു.