ലോകത്തിലെ ഏറ്റവും ഉയരം കൂടിയ റെയില്‍ പാലം, ചെനാബ് പാലത്തിന്റെ സവിശേഷകള്‍ അറിയാം

ജമ്മു: കശ്മീരിലേക്കുള്ള റെയില്‍ എന്ന സ്വപ്നം ഇന്ന് പൂര്‍ത്തീകരിക്കും. പ്രധാനമന്ത്രി നരേന്ദ്ര മോദി ഇന്ന് ജമ്മു കശ്മീരിന് രണ്ട് വന്ദേ ഭാരത് എക്‌സ്പ്രസ് ട്രെയിനുകള്‍ സമ്മാനിക്കും. ഉധംപൂര്‍-ശ്രീനഗര്‍-ബാരാമുള്ള റെയില്‍ ലിങ്ക് (യുഎസ്ബിആര്‍എല്‍) പദ്ധതിയുടെ കീഴിലാണ് കാശ്മീരിലേക്ക് ട്രെയിന്‍ എത്തിക്കുന്നതിനുള്ള പ്രവര്‍ത്തനങ്ങള്‍ നടന്നത്. 

ധൈര്യം, ദൃഢനിശ്ചയം, എന്തെങ്കിലും നേടാനുള്ള ആഗ്രഹം എന്നിവയാണ് ലോകത്തിലെ ഏറ്റവും ഉയരം കൂടിയ റെയില്‍വേ ആര്‍ച്ച് പാലത്തിന്റെ നിര്‍മ്മാണത്തിലേക്ക് നയിച്ചത്. പ്രധാനമന്ത്രി നരേന്ദ്ര മോദി ഇന്ന് വന്ദേ ഭാരത് എക്‌സ്പ്രസ് ഉദ്ഘാടനം ചെയ്യുകയും ഫ്‌ലാഗ് ഓഫ് ചെയ്യുകയും ചെയ്യും.  

ചെനാബ് റെയില്‍ പാലം ഉരുക്കും കോണ്‍ക്രീറ്റും ചേര്‍ന്ന ഒരു കമാന പാലമാണ്. പാലത്തിന്റെ കമാനത്തിന്റെ അടിത്തറ ഒരു ഫുട്‌ബോള്‍ മൈതാനത്തിന്റെ പകുതിയോളം വലുതാണ്. കൊടുങ്കാറ്റുകളോ, തീവ്രമായതോ, പൂജ്യത്തിന് താഴെയുള്ളതോ ആയ താപനിലകളോ ബാധിക്കാത്ത വിധത്തിലാണ് ഈ പാലം രൂപകല്‍പ്പന ചെയ്തിരിക്കുന്നത്. ഒരു വലിയ ഭൂകമ്പത്തില്‍ പോലും ഈ പാലം ഉറച്ചുനില്‍ക്കും.

ഫ്രാന്‍സിലെ ഈഫല്‍ ടവറിനേക്കാള്‍ ഉയരമുള്ളതാണ് ചെനാബ് പാലം. ഈഫല്‍ ടവറിന്റെ ഉയരം 330 മീറ്ററാണ്, അതേസമയം ചെനാബ് പാലത്തിന്റെ ഉയരം 359 മീറ്ററാണ്.

ഇതിന്റെ നീളം 1315 മീറ്ററും വീതി 13 മീറ്ററുമാണ്.ഇതിന്റെ നിര്‍മ്മാണത്തിന് ഏകദേശം 1,486 കോടി രൂപ ചെലവഴിച്ചു. മണിക്കൂറില്‍ 266 കിലോമീറ്റര്‍ വേഗതയില്‍ വീശുന്ന കാറ്റിനെ എളുപ്പത്തില്‍ ചെറുക്കാന്‍ ഈ പാലത്തിന് കഴിയും.

ഈ പാലത്തിന്റെ ബലം 120 വര്‍ഷം നിലനില്‍ക്കുമെന്ന് അവകാശപ്പെടുന്നു. കാറ്റിന്റെ വേഗത, താപനില, വൈബ്രേഷന്‍ തുടങ്ങിയ വിവരങ്ങള്‍ നല്‍കാന്‍ പാലത്തില്‍ 112 സെന്‍സറുകള്‍ സ്ഥാപിച്ചിട്ടുണ്ട്. 30350 മെട്രിക് ടണ്‍ ഉരുക്കാണ് ഇതിന്റെ നിര്‍മ്മാണത്തിനായി ഉപയോഗിച്ചിരിക്കുന്നത്.

ഇതിന്റെ നിര്‍മ്മാണത്തിനായി കൊങ്കണ്‍, അഫ്കാന്‍, കെആര്‍സിഎല്‍ എന്നിവ നോര്‍ത്തേണ്‍ റെയില്‍വേയുമായി സഹകരിച്ചു. ഇതോടൊപ്പം ഡിആര്‍ഡിഒ, ജിയോഗ്രാഫിക് സര്‍വേ ഓഫ് ഇന്ത്യ തുടങ്ങിയ സംഘടനകളും ഇതില്‍ പങ്കാളികളായി. ഐഐടി റൂര്‍ക്കി, ഐഐടി ഡല്‍ഹി എന്നിവയും സംഭാവന നല്‍കി.

150 സെര്‍വറുകള്‍ ഉള്‍ക്കൊള്ളുന്ന അത്യാധുനിക കണ്‍ട്രോള്‍ റൂം നിര്‍മ്മിച്ചിട്ടുണ്ട്. ഒരു സ്‌ഫോടനം പോലും പാലത്തിന് കേടുപാടുകള്‍ വരുത്താത്തത്ര ശക്തമാണ്.