ആദായനികുതി തട്ടിപ്പ്: തമിഴ്‌നാട്ടിൽ വ്യാപക റെയ്ഡ്

ചെന്നൈ: തമിഴ്നാട്ടിൽ വ്യാപകമായ ആദായനികുതി തട്ടിപ്പ് നടത്തിയതിന് പൊതുമേഖലാ സ്ഥാപനങ്ങളിലെയും സ്വകാര്യ സ്ഥാപനങ്ങളിലെയും ജീവനക്കാർക്കെതിരെ ആദായ നികുതി വകുപ്പ് അന്വേഷണം ആരംഭിച്ചു.

തമിഴ്നാട്ടിലും പുതുച്ചേരിയിലും ഏകദേശം 3,000 നികുതിദായകർക്കെതിരെയാണ് അന്വേഷണം നടക്കുന്നത്.

വ്യാപകമായ ആദായനികുതി തട്ടിപ്പിന് വിധേയരായവരിൽ പൊതുമേഖലാ സ്ഥാപനങ്ങളിലെയും (പിഎസ്‌യു) കോർപറേറ്റുകളിലെയും ജീവനക്കാരും ഉൾപ്പെടുന്നതായാണ് കണ്ടെത്തൽ. 

ആദായനികുതി കൺസൾട്ടൻമാർ, ചാർട്ടേഡ് അക്കൗണ്ടന്റ്മാർ, ഇടനിലക്കാർ, നികുതിദായകർ എന്നിവരുമായി ബന്ധമുള്ള ഒന്നിലധികം സ്ഥലങ്ങൾ ഐടി വകുപ്പിന്റെ അന്വേഷണ വിഭാഗം പരിശോധനയ്ക്ക് വിധേയമാക്കി.

രാഷ്ട്രീയ പാർട്ടികളുടെ പേരുകളിൽ എഡിറ്റ് ചെയ്ത സംഭാവന രസീതുകൾ ഉപയോഗിക്കുന്നതായിരുന്നു സ്ഥാപനങ്ങളുടെ രീതി.