ഇന്ത്യയും പാകിസ്ഥാനും അയല്‍ക്കാരാണ്. അവര്‍ രണ്ടുപേരും ചൈനയുടെയും അയല്‍ക്കാരാണ്. ഇന്ത്യയുടെ സൈനിക നടപടി ഖേദകരം. ഇന്ത്യയും പാകിസ്ഥാനും സംയമനം പാലിക്കണമെന്ന് ചൈന

ഡല്‍ഹി: മേഖലയിലെ സമാധാനത്തിനും സ്ഥിരതയ്ക്കും വേണ്ടി ഇന്ത്യയും പാകിസ്ഥാനും പരമാവധി സംയമനം പാലിക്കണമെന്ന് ചൈന  ആവശ്യപ്പെട്ടു.

പഹല്‍ഗാം ഭീകരാക്രമണത്തിന് പ്രതികാരമായി ഇന്ത്യന്‍ സായുധ സേന പാകിസ്ഥാനിലെയും പാകിസ്ഥാന്‍ അധിനിവേശ കശ്മീരിലെയും ഒമ്പത് ഭീകര താവളങ്ങളില്‍ ബുധനാഴ്ച പുലര്‍ച്ചെ മിസൈല്‍ ആക്രമണം നടത്തിയതിന് പിന്നാലെയാണ് ചൈനീസ് വിദേശകാര്യ മന്ത്രാലയത്തിന്റെ പ്രസ്താവന.

'നിലവിലുള്ള സ്ഥിതിഗതികളില്‍ ഞങ്ങള്‍ക്ക് ആശങ്കയുണ്ട്. ഇന്ത്യയും പാകിസ്ഥാനും എപ്പോഴും പരസ്പരം അയല്‍ക്കാരാണ്. അവര്‍ രണ്ടുപേരും ചൈനയുടെയും അയല്‍ക്കാരാണ്,' പ്രസ്താവനയില്‍ പറയുന്നു.

'ചൈന എല്ലാത്തരം ഭീകരതയെയും എതിര്‍ക്കുന്നു,' പഹല്‍ഗാം ഭീകരാക്രമണത്തെ പരാമര്‍ശിച്ചുകൊണ്ട് പ്രസ്താവന കൂട്ടിച്ചേര്‍ത്തു.

'സമാധാനത്തിന്റെയും സ്ഥിരതയുടെയും വലിയ താല്‍പ്പര്യങ്ങള്‍ക്കായി പ്രവര്‍ത്തിക്കാനും, ശാന്തത പാലിക്കാനും, സംയമനം പാലിക്കാനും, സ്ഥിതി കൂടുതല്‍ സങ്കീര്‍ണ്ണമാക്കുന്ന നടപടികള്‍ സ്വീകരിക്കുന്നതില്‍ നിന്ന് വിട്ടുനില്‍ക്കാനും ഞങ്ങള്‍ ഇരുവിഭാഗങ്ങളോടും അഭ്യര്‍ത്ഥിക്കുന്നു. ഇന്ന് പുലര്‍ച്ചെ നടന്ന ഇന്ത്യയുടെ സൈനിക നടപടി ഖേദകരമാണെന്നും പ്രസ്താവന കൂട്ടിച്ചേര്‍ത്തു.