കർണാടക ചിത്രദുർഗയിൽ സ്ലീപ്പർ ബസ് ട്രക്കുമായി കൂട്ടിയിടിച്ച് തീപിടിച്ച് പത്തിലധികം പേർ മരിച്ചു. അപകടത്തിൽ നിരവധി പേർക്ക് പരിക്കേറ്റു

ബെംഗളൂരു: കര്‍ണാടകയിലെ ചിത്രദുര്‍ഗ ജില്ലയിലെ ഗോര്‍ലത്തു ഗ്രാമത്തിന് സമീപം വ്യാഴാഴ്ച രാവിലെ ഒരു ലോറിയുമായി കൂട്ടിയിടിച്ച് സ്വകാര്യ ബസിന് തീപിടിച്ച് പത്തിലധികം പേര്‍ മരിച്ചു. ദേശീയപാത 48 ല്‍ ലോറി ബസില്‍ ഇടിച്ചതാണ് അപകടത്തിന് കാരണമെന്നാണ് പ്രാഥമിക റിപ്പോര്‍ട്ടുകള്‍.

അപകടത്തില്‍ നിരവധി പേര്‍ക്ക് പരിക്കേറ്റു. ഇവരെ ഹിരിയൂരിലെയും ചിത്രദുര്‍ഗയിലെയും ആശുപത്രികളില്‍ പ്രവേശിപ്പിച്ചിട്ടുണ്ട്. മരണസംഖ്യ ഉയര്‍ന്നേക്കാമെന്ന് ഉദ്യോഗസ്ഥര്‍ സംശയിക്കുന്നു. അതേസമയം, നോര്‍ത്ത് ഈസ്റ്റേണ്‍ റേഞ്ച് ഇന്‍സ്‌പെക്ടര്‍ ജനറല്‍ ഓഫ് പോലീസ് (ഐജിപി) ബി.ആര്‍. രവികാന്തെ ഗൗഡ, ചിത്രദുര്‍ഗ പോലീസ് സൂപ്രണ്ട് (എസ്പി) രഞ്ജിത്ത് കുമാര്‍ ബന്ദാരു എന്നിവരുള്‍പ്പെടെയുള്ള മുതിര്‍ന്ന ഉദ്യോഗസ്ഥരും സ്ഥലത്തെത്തിയിട്ടുണ്ട്.

32 പേരുമായി ബെംഗളൂരുവില്‍ നിന്ന് ശിവമോഗയിലേക്ക് പോവുകയായിരുന്ന ബസാണ് സീ ബേര്‍ഡ് എന്ന സ്വകാര്യ സര്‍വീസിന്റേത്.

ഹിരിയൂര്‍ റൂറല്‍ പോലീസ് സ്റ്റേഷന്‍ പരിധിയില്‍ പുലര്‍ച്ചെ നടന്ന അപകടം ലോറി ഡ്രൈവറുടെ അശ്രദ്ധ മൂലമാണെന്ന് പ്രാഥമിക റിപ്പോര്‍ട്ടുകള്‍ സൂചിപ്പിക്കുന്നു. ലോറി ഡിവൈഡര്‍ കടന്ന് ബസില്‍ ഇടിച്ചുകയറി തീപിടുത്തത്തില്‍ 10 ലധികം പേര്‍ മരിച്ചു. 

ലോറി ഡ്രൈവര്‍ ഉറങ്ങിപ്പോയതാകാം അപകടകാരണമെന്ന് സംശയിക്കുന്നതായും അന്വേഷണം ആരംഭിച്ചതായും പോലീസ് പറഞ്ഞു. 

'എന്‍എച്ച് -48 ല്‍ പുലര്‍ച്ചെ 2 മണിയോടെയാണ് അപകടം നടന്നത്. ബെംഗളൂരുവിലേക്ക് പോകുകയായിരുന്ന ട്രക്ക് ഡ്രൈവര്‍ ഉറങ്ങിപ്പോയി ഡിവൈഡര്‍ കടന്ന് ഒരു ബസില്‍ ഇടിച്ചു. ബസിന് ഉടന്‍ തന്നെ തീ പിടിച്ചു. ട്രക്കിനും തീ പിടിച്ചു, ഡ്രൈവര്‍ ഉടന്‍ തന്നെ മരിച്ചു,' മാധ്യമപ്രവര്‍ത്തകരോട് സംസാരിക്കവെ ബന്ദാരു പറഞ്ഞു.

'ബസ്സില്‍ ഡ്രൈവറും കണ്ടക്ടറും ഉള്‍പ്പെടെ 32 പേര്‍ ഉണ്ടായിരുന്നു. ഇവരില്‍ 21 പേരെ പുറത്തെടുത്തു. അഞ്ചോ ആറോ പേര്‍ക്ക് പരിക്കേറ്റിട്ടുണ്ട്, അവര്‍ ചികിത്സയിലാണ്. അവരുടെ നില ഗുരുതരമല്ല,' അദ്ദേഹം കൂട്ടിച്ചേര്‍ത്തു.