ഡൽഹിയിലെ വായു ഗുണനിലവാര സൂചിക ഇന്ന് 306 ആയി നേരിയ പുരോഗതി, ക്ലൗഡ് സീഡിംഗ് പരീക്ഷണത്തിന് സാധ്യത

ഡല്‍ഹി: കേന്ദ്ര മലിനീകരണ നിയന്ത്രണ ബോര്‍ഡിന്റെ (സിപിസിബി) കണക്കുകള്‍ പ്രകാരം, ഡല്‍ഹി-എന്‍സിആറിലെ വായു ഗുണനിലവാര സൂചിക (എക്യുഐ) ചൊവ്വാഴ്ച 306 ആയി രേഖപ്പെടുത്തി. തിങ്കളാഴ്ച ഇത് 315 ആയിരുന്നു. 

ഈ കുറവ് ഉണ്ടായിരുന്നിട്ടും, വായുവിന്റെ ഗുണനിലവാരം 'വളരെ മോശം' വിഭാഗത്തില്‍ തുടരുന്നത് നിരന്തരമായ മലിനീകരണ ആശങ്കകളുടെ സൂചനയാണ്. ശനിയാഴ്ച വായു ഗുണനിലവാര സൂചിക 257 ല്‍ തുടര്‍ന്നു.

ഇന്ന് വൈകിട്ടോടെ വായുനിലവാര സൂചിക 320 നും 350 നും ഇടയില്‍ വീണ്ടും ഉയര്‍ന്നേക്കാമെന്നും, ഇത് വായുവിനെ 'വളരെ മോശം' മേഖലയില്‍ നിലനിര്‍ത്തുമെന്നും ഏര്‍ലി വാണിംഗ് സിസ്റ്റം പ്രവചനം സൂചിപ്പിക്കുന്നു.

കാലാവസ്ഥ അനുകൂലമാണെങ്കില്‍, ഡല്‍ഹിയില്‍ ഇന്ന് ആദ്യത്തെ ക്ലൗഡ് സീഡിംഗ് പരീക്ഷണം നടക്കുമെന്ന് ഒരു ഉദ്യോഗസ്ഥന്‍ സ്ഥിരീകരിച്ചു.

അന്തരീക്ഷ സാഹചര്യങ്ങളെ ആശ്രയിച്ച് പരീക്ഷണം നടത്തുന്നതിന്റെ സാധ്യത അവലോകന യോഗം വിലയിരുത്തുമെന്ന് പരിസ്ഥിതി മന്ത്രി മഞ്ജീന്ദര്‍ സിംഗ് സിര്‍സ പറഞ്ഞു.