കശ്മീരിലെ മേഘവിസ്ഫോടനം; മരണസംഖ്യ ഉയരുന്നു; രക്ഷാപ്രവർത്തനം തുടരുന്നു

ജമ്മു: ജമ്മു കശ്മീരിലെ കിഷ്ത്വാറില്‍ നടന്ന മേഘവിസ്‌ഫോടനത്തില്‍ ഇതുവരെ 65 പേര്‍ മരിച്ചു. നിരവധി പേര്‍ അവശിഷ്ടങ്ങള്‍ക്കടിയില്‍ കുടുങ്ങിക്കിടക്കുന്നതിനാല്‍ രണ്ടാം ദിവസവും രക്ഷാപ്രവര്‍ത്തനം ഊര്‍ജ്ജിതമായി തുടരുകയാണ്.

മച്ചൈല്‍ മാതാ യാത്ര നടക്കുന്ന വഴിയില്‍ ഹിമാലയത്തിലെ മാതാ ചണ്ഡി ക്ഷേത്രത്തിലേക്കുള്ള പാതയില്‍ ഉണ്ടായ മിന്നല്‍ പ്രളയത്തില്‍ നൂറുകണക്കിന് ആളുകളെ കാണാതായി. അവരില്‍ പലരും അവശിഷ്ടങ്ങള്‍ക്കടിയില്‍ അകപ്പെട്ടതായി ആശങ്കയുണ്ട്. 

ഇതുവരെ 167 പേരെ പരിക്കുകളോടെ രക്ഷപ്പെടുത്തി. അതില്‍ 38 പേരുടെ നില ഗുരുതരമാണ്. യാത്രയ്ക്കായി സ്ഥാപിച്ചിരുന്ന ഒരു താല്‍ക്കാലിക മാര്‍ക്കറ്റും, ലങ്കാര്‍ സ്ഥലവും (സമുദായ അടുക്കള), സുരക്ഷാ ഔട്ട്പോസ്റ്റും ഒലിച്ചുപോയതിനാല്‍ കൂടുതല്‍ ആളുകള്‍ കുടുങ്ങിക്കിടക്കുന്നതായി കരുതുന്നു.