റമ്പാനിൽ കനത്ത നാശനഷ്ടം വിതച്ച് മേഘവിസ്ഫോടനം, മൂന്ന് പേർ മരിച്ചു, അഞ്ച് പേരെ കാണാതായി

ജമ്മു: വെള്ളിയാഴ്ച രാത്രി റംബാന്‍ ജില്ലയിലെ രാജ്ഗഡ് തഹ്സിലില്‍ പെട്ടെന്നുണ്ടായ മേഘവിസ്ഫോടനത്തില്‍ മൂന്ന് പേര്‍ മരിക്കുകയും അഞ്ച് പേരെ കാണാതാവുകയും ചെയ്തു.

ദുരിതാശ്വാസ, രക്ഷാപ്രവര്‍ത്തകരെ ഉടന്‍ തന്നെ ദുരിതബാധിത പ്രദേശത്തേക്ക് അയച്ചതായും കാണാതായവരെ കണ്ടെത്താനുള്ള തിരച്ചില്‍ ആരംഭിച്ചതായും പ്രാദേശിക അധികാരികള്‍ അറിയിച്ചു.

ഇതുവരെ മൂന്ന് മൃതദേഹങ്ങള്‍ കണ്ടെടുത്തതായും അഞ്ച് പേരെ ഇപ്പോഴും കാണാനില്ലെന്നും ഉദ്യോഗസ്ഥര്‍ പറഞ്ഞു. പെട്ടെന്നുള്ള മേഘവിസ്‌ഫോടനം കാരണം പ്രദേശത്ത് വെള്ളപ്പൊക്കത്തിന് സമാനമായ സാഹചര്യം ഉണ്ടായതായും നിരവധി വീടുകളും വസ്തുവകകളും നശിച്ചതായും ഇത് സാധാരണ ജീവിതം തടസ്സപ്പെടുത്തിയതായും അധികൃതര്‍ അറിയിച്ചു.

ദുരിതബാധിതരായ കുടുംബങ്ങള്‍ക്ക് അടിയന്തര സഹായം നല്‍കുന്നതിനുള്ള ശ്രമങ്ങള്‍ ഭരണകൂടം ഊര്‍ജിതമാക്കിയിട്ടുണ്ട്. കാണാതായവരെ കണ്ടെത്തുന്നതിനായി ദുരിതാശ്വാസ, രക്ഷാപ്രവര്‍ത്തനങ്ങള്‍ തുടര്‍ച്ചയായി നടന്നുവരികയാണ്.