ഗാന്ധിനഗറിൽ മലിനജലം: ഒരാഴ്ചയ്ക്കുള്ളിൽ നൂറിലധികം പേർ അസുഖബാധിതർ

ഡല്‍ഹി: ഗാന്ധിനഗറില്‍ കഴിഞ്ഞ അഞ്ച് ദിവസത്തിനിടെ നൂറിലധികം ടൈഫോയ്ഡ് കേസുകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. ഗാന്ധിനഗര്‍ സിവില്‍ ആശുപത്രിയില്‍ കുട്ടികള്‍ ഉള്‍പ്പെടെ 104 രോഗികള്‍ നിലവില്‍ ചികിത്സയിലാണെന്ന് അധികൃതര്‍ അറിയിച്ചു.

ഗുജറാത്ത് ഉപമുഖ്യമന്ത്രി ഹര്‍ഷ് സംഘവി സിവില്‍ ആശുപത്രിയിലെ സ്ഥിതിഗതികള്‍ അവലോകനം ചെയ്യുകയും രോഗികളെയും അവരുടെ കുടുംബാംഗങ്ങളെയും കാണുകയും ചെയ്തു.

ആശുപത്രിയില്‍ പ്രവേശിപ്പിച്ചവരെ ചികിത്സിക്കുന്നതിനായി 22 ഡോക്ടര്‍മാരുടെ ഒരു പ്രത്യേക സംഘത്തെ ഭരണകൂടം രൂപീകരിച്ചിട്ടുണ്ടെന്നും ഡെപ്യൂട്ടി കളക്ടര്‍ ഉള്‍പ്പെടെയുള്ള മുതിര്‍ന്ന ഉദ്യോഗസ്ഥരോട് സ്ഥിതിഗതികള്‍ നിരന്തരം വിലയിരുത്താന്‍ ആവശ്യപ്പെട്ടിട്ടുണ്ടെന്നും അദ്ദേഹം പറഞ്ഞു.

'നിലവില്‍ 104 സംശയാസ്പദമായ കേസുകള്‍ റിപ്പോര്‍ട്ട് ചെയ്യപ്പെട്ടിട്ടുണ്ട്. ഭരണകൂടം ചികിത്സയും നിരീക്ഷണ ക്രമീകരണങ്ങളും തുടര്‍ച്ചയായി ശക്തിപ്പെടുത്തിക്കൊണ്ടിരിക്കുകയാണ്.

രോഗികള്‍ക്കും അവരുടെ കുടുംബങ്ങള്‍ക്കും മെച്ചപ്പെട്ട സൗകര്യങ്ങള്‍ നല്‍കുന്നതിനുള്ള ശ്രമങ്ങള്‍ തുടരുകയാണ്,' സംഘവി പറഞ്ഞു.