ചുമ സിറപ്പാണെന്ന് കരുതി എന്റെ കുട്ടിക്ക് വിഷം കൊടുത്തു: ചിന്ദ്വാര ദുരന്തത്തില്‍ മരിച്ച 3 വയസുകാരന്റെ അമ്മ പറയുന്നു

ഡല്‍ഹി:  മധ്യപ്രദേശിലെ ചിന്ദ്വാര കഫ് സിറപ്പ് ദുരന്തത്തില്‍ ദുഃഖിതരായ മാതാപിതാക്കളില്‍ ഒരാളാണ് അഫ്‌സാന.

മൂന്ന് വയസ്സുള്ള കുഞ്ഞ് ഡോക്ടര്‍ നിര്‍ദ്ദേശിച്ച കഫ് സിറപ്പ് കഴിച്ചതിനെ തുടര്‍ന്ന് മരിച്ചു. ഒരു ഡോക്ടറുടെ ശുപാര്‍ശ പ്രകാരമാണ് താന്‍ മരുന്ന് നല്‍കിയതെന്നും അത് മാരകമാകുമെന്ന് അറിയില്ലായിരുന്നുവെന്നും അഫ്‌സാന പറഞ്ഞു.

'കഫ് സിറപ്പ് ആണെന്ന് കരുതിയാണ് ഞാന്‍ അത് അവന് കൊടുത്തത്. അത് വിഷമാണെന്ന് എനിക്കറിയില്ലായിരുന്നു. എനിക്കറിയാമായിരുന്നെങ്കില്‍, ഞാന്‍ ഒരിക്കലും അത് നല്‍കുമായിരുന്നില്ല. മരുന്ന് യഥാര്‍ത്ഥത്തില്‍ വിഷമാണെന്ന് ആര്‍ക്കും അറിയില്ലായിരുന്നു,' അവര്‍ പറഞ്ഞു.

ചിന്ദ്വാര ചുമ സിറപ്പ് ദുരന്തത്തില്‍ മരിച്ചവരുടെ എണ്ണം 19 ആയി ഉയര്‍ന്നു, ചൊവ്വാഴ്ച മൂന്ന് കുട്ടികള്‍ കൂടി മരിച്ചു. ജില്ലാ ഭരണകൂടത്തിന്റെ കണക്കനുസരിച്ച്, ചിന്ദ്വാരയില്‍ നിന്ന് 17 മരണങ്ങളും ബേതുല്‍ ജില്ലയില്‍ രണ്ട് കുട്ടികളും മരിച്ചു. 

തുടക്കത്തില്‍ മകന്‍ സുഖം പ്രാപിക്കുന്നതിന്റെ ലക്ഷണങ്ങള്‍ കാണിച്ചെങ്കിലും താമസിയാതെ കൈകളിലും കാലുകളിലും വീക്കം വന്നതായി അഫ്‌സാന ഓര്‍മ്മിച്ചു.

''മകന്റെ നില ഗുരുതരമാണെന്ന് ഡോക്ടര്‍ എന്നോട് പറഞ്ഞു, മകനെ ചിന്ദ്വാരയിലെ സിറ്റി ആശുപത്രിയിലേക്ക് കൊണ്ടുപോകാന്‍ എന്നോട് നിര്‍ദ്ദേശിച്ചു,'' അവിടെ ശരിയായ ചികിത്സ ലഭിക്കാത്തതിനെത്തുടര്‍ന്ന്, കുട്ടിയെ നാഗ്പൂരിലേക്ക് കൊണ്ടുപോയി.

ഡോക്ടര്‍മാരും ആശുപത്രി ജീവനക്കാരും മുതല്‍ സിറപ്പ് നിര്‍മ്മിച്ച ഫാര്‍മസ്യൂട്ടിക്കല്‍ കമ്പനി വരെ എല്ലാവരും ഉത്തരവാദികളാണെന്ന് താന്‍ വിശ്വസിക്കുന്നുവെന്ന് അഫ്‌സാന പറഞ്ഞു.

'എല്ലാവരും കുറ്റക്കാരാണ്. ഇവിടെ ഒരു ന്യായീകരണവുമില്ല. ഈ സിറപ്പ് ഉണ്ടാക്കിയ കമ്പനിയാണ് ഏറ്റവും വലിയ കുറ്റക്കാര്‍. അവര്‍ക്ക് ഏറ്റവും കഠിനമായ ശിക്ഷ ലഭിക്കണം,' അവര്‍ ആവശ്യപ്പെട്ടു.