ഭീകര ബന്ധമുണ്ടെന്ന് ആരോപിച്ച് ചോദ്യം ചെയ്യുന്നതിനായി കസ്റ്റഡിയിലെടുത്ത ലഷ്‌കര്‍ ഭീകരനെന്ന് സംശയിക്കുന്ന യുവാവ് രക്ഷപ്പെടുന്നതിനിടെ മുങ്ങിമരിച്ചു. മൃതദേഹം അരുവിയില്‍ നിന്ന് കണ്ടെടുത്തു

ഡല്‍ഹി: ഭീകര ബന്ധമുണ്ടെന്ന് ആരോപിച്ച് ചോദ്യം ചെയ്യുന്നതിനായി കസ്റ്റഡിയിലെടുത്ത ജമ്മു കശ്മീരിലെ കുല്‍ഗാമില്‍ നിന്നുള്ള 23 വയസ്സുള്ള ഒരാളുടെ മൃതദേഹം അരുവിയില്‍ നിന്ന് കണ്ടെടുത്തു.

രക്ഷപ്പെടാന്‍ ശ്രമിക്കുന്നതിനിടെ ഇയാള്‍ അരുവിയിലേക്ക് ചാടിയതായി പോലീസ് അവകാശപ്പെടുന്നു. എന്നാല്‍ യുവാവിന്റെത് കസ്റ്റഡി മരണമാണെന്ന് കുടുംബം ആരോപിച്ചു.

ലഷ്‌കര്‍-ഇ-തൊയ്ബ സ്ലീപ്പര്‍ സെല്ലിലെ അംഗമാണെന്ന് സംശയിച്ചാണ് ഇംതിയാസ് അഹമ്മദ് എന്നയാളെ പോലീസ് കസ്റ്റഡിയിലെടുത്തത്.

ഇയാളെ ചോദ്യം ചെയ്യുന്നതിനായി ഒരു ഒളിത്താവളത്തിലേക്ക് കൊണ്ടുപോയി, രക്ഷപ്പെടാനുള്ള ശ്രമത്തിനിടെ ഇയാള്‍ വൈഷോ അരുവിയില്‍ ചാടി. തുടര്‍ന്ന് മുങ്ങിമരിച്ചതായി പോലീസ് പറഞ്ഞു.

ഏപ്രില്‍ 23 ന് സുരക്ഷാ സേനയുമായുള്ള ചെറിയ വെടിവയ്പ്പിനുശേഷം രണ്ട് തീവ്രവാദികള്‍ രക്ഷപ്പെട്ട ഒരു ഏറ്റുമുട്ടലിനെക്കുറിച്ചുള്ള അന്വേഷണത്തിലാണ് ഇംതിയാസിന്റെ പങ്ക് പുറത്തുവന്നതെന്ന് പോലീസ് പറഞ്ഞു.

ചോദ്യം ചെയ്യലില്‍ ലഷ്‌കര്‍ ഒളിത്താവളത്തെക്കുറിച്ച് അറിവുണ്ടെന്ന് ഇംതിയാസ് സമ്മതിച്ചതായും തുടര്‍ന്ന് ഇയാള്‍ പറഞ്ഞ സ്ഥലത്തേക്ക് കൊണ്ടുപോയതായും പോലീസ് അവകാശപ്പെടുന്നു.

ഈ സമയത്താണ് ഇയാള്‍ രക്ഷപ്പെടാന്‍ വൈഷോ അരുവിയില്‍ ചാടിയതെന്നും മുങ്ങിമരിച്ചതെന്നും പൊലീസ് പറഞ്ഞു. ഇംതിയാസ് അരുവിയിലേക്ക് ചാടുന്നതും ഒഴുക്കില്‍പ്പെട്ടുപോകുന്നതും കാണിക്കുന്ന ഡ്രോണ്‍ ദൃശ്യങ്ങള്‍ പോലീസ് പുറത്തുവിട്ടു.