തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം അടുത്ത 12 മണിക്കൂറിനുള്ളില്‍ ഫെംഗല്‍ ചുഴലിക്കാറ്റായി മാറും. നവംബര്‍ 29-ന് തമിഴ്നാട് തീരത്തെത്തുമെന്ന് മുന്നറിയിപ്പ്

ചെന്നൈ: തെക്കുപടിഞ്ഞാറന്‍ ബംഗാള്‍ ഉള്‍ക്കടലില്‍ രൂപപ്പെട്ട ന്യൂനമര്‍ദം അടുത്ത 12 മണിക്കൂറിനുള്ളില്‍ ഫെംഗല്‍ ചുഴലിക്കാറ്റായി മാറുമെന്ന് കാലാവസ്ഥാ നിരീക്ഷണ കേന്ദ്രം അറിയിച്ചു.

ചുഴലിക്കാറ്റ് ബുധനാഴ്ച രാവിലെ 5.30 ന് വടക്ക്-വടക്കുപടിഞ്ഞാറ് ദിശയില്‍ 13 കിലോമീറ്റര്‍ വേഗതയില്‍ നീങ്ങുന്നതായി കണ്ടെത്തി.

നാഗപട്ടണം, പുതുച്ചേരി, കടലൂര്‍, ചെന്നൈ എന്നിവയുള്‍പ്പെടെ തമിഴ്നാടിന്റെ തീരദേശ ജില്ലകളില്‍ ചുഴലിക്കാറ്റ് ശക്തമായ കാറ്റിനും കനത്ത മഴയ്ക്കും ഉയര്‍ന്ന തിരമാലകള്‍ക്കും കാരണമാകുമെന്ന് പ്രവചിക്കുന്നു.

ചുഴലിക്കാറ്റിന്റെ ആഘാതങ്ങള്‍ ആന്ധ്രാപ്രദേശിന്റെ തീരപ്രദേശങ്ങളിലും അനുഭവപ്പെടും.

തമിഴ്നാട്ടിലെ തിരുവള്ളൂര്‍, ചെന്നൈ, ചെങ്കല്‍പട്ട്, കാഞ്ചീപുരം, വില്ലുപുരം, കടലൂര്‍, മയിലാടുതുറൈ, നാഗപട്ടണം, തിരുവാരൂര്‍, തഞ്ചാവൂര്‍, പുതുക്കോട്ടൈ, അരിയല്ലൂര്‍, പേരാമ്പല്ലൂര്‍ രാമനാഥപുരം, പുതുച്ചേരി, കാരക്കല്‍ ജില്ലകളില്‍ ഒറ്റപ്പെട്ട സ്ഥലങ്ങളില്‍ ഇടിയോടുകൂടിയ ശക്തമായ മഴയ്ക്കൊപ്പം ഇടിമിന്നലിനും സാധ്യതയുണ്ട്. 

ചില സ്ഥലങ്ങളില്‍ വെള്ളക്കെട്ട് ഉണ്ടാകാം, ഇത് ഗതാഗതത്തെയും ദൈനംദിന ജീവിതത്തെയും ബാധിച്ചേക്കാം.