ദിത്വാ ചുഴലിക്കാറ്റ്: തമിഴ്‌നാട്ടിൽ മഴയുമായി ബന്ധപ്പെട്ട അപകടങ്ങളിൽ മൂന്ന് പേർ മരിച്ചു; 57,000 ഹെക്ടർ കൃഷിഭൂമി നശിച്ചു

ചെന്നൈ: തമിഴ്നാട്ടില്‍ ആഞ്ഞടിച്ച ദിത്വാ ചുഴലിക്കാറ്റിനെ തുടര്‍ന്നുണ്ടായ മഴയുമായി ബന്ധപ്പെട്ട അപകടങ്ങളില്‍ കുറഞ്ഞത് മൂന്ന് പേര്‍ മരിച്ചതായി മന്ത്രി കെ.കെ.എസ്.എസ്.ആര്‍ രാമചന്ദ്രന്‍ ഞായറാഴ്ച പറഞ്ഞു. 'ഇന്നലെ വൈകുന്നേരം മുതല്‍ മഴയുമായി ബന്ധപ്പെട്ട അപകടങ്ങളില്‍ മൂന്ന് പേര്‍ മരിച്ചു. 

തൂത്തുക്കുടിയിലും തഞ്ചാവൂരിലും മതില്‍ ഇടിഞ്ഞുവീണ് യഥാക്രമം രണ്ട് പേര്‍ മരിച്ചു, മയിലാടുതുറൈയില്‍ 20 വയസ്സുള്ള ഒരു യുവാവ് വൈദ്യുതാഘാതമേറ്റ് മരിച്ചു,' അദ്ദേഹം സ്റ്റേറ്റ് എമര്‍ജന്‍സി ഓപ്പറേഷന്‍സ് സെന്ററില്‍ മാധ്യമപ്രവര്‍ത്തകരോട് പറഞ്ഞു.

ദിത്വാ ചുഴലിക്കാറ്റിനെ തുടര്‍ന്നുണ്ടായ കനത്ത മഴയില്‍ തമിഴ്നാട്ടിലെ ഡെല്‍റ്റ ജില്ലകളിലായി 149 കന്നുകാലികള്‍ ചത്തതായും 57,000 ഹെക്ടര്‍ കൃഷിഭൂമി നശിച്ചതായും രാമചന്ദ്രന്‍ പറഞ്ഞു.

കനത്ത മഴയെത്തുടര്‍ന്ന് 57,000 ഹെക്ടര്‍ കൃഷിഭൂമി വെള്ളത്തിനടിയിലായി, അദ്ദേഹം പറഞ്ഞു. ഡെല്‍റ്റ മേഖലയിലുടനീളം 234 കുടിലുകള്‍ക്ക് കേടുപാടുകള്‍ സംഭവിച്ചതായി ഒരു ചോദ്യത്തിന് മറുപടിയായി മന്ത്രി കൂട്ടിച്ചേര്‍ത്തു.