ആംബുലൻസ് ലഭിച്ചില്ല, മധ്യപ്രദേശിൽ ഭർത്താവ് ഉന്തുവണ്ടിയിൽ ആശുപത്രിയിലെത്തിച്ച ഭാര്യ മരിച്ചു

ഭോപ്പാൽ: ആംബുലൻസ് സൗകര്യം ലഭിക്കാത്തതിനെത്തുടർന്ന് ഭർത്താവ് ഉന്തുവണ്ടിയിൽ ആശുപത്രിയിലെത്തിക്കാൻ ശ്രമിച്ച രോഗിയായ വീട്ടമ്മ വഴിമധ്യേ മരിച്ചു. 

മധ്യപ്രദേശിലെ സാഗറിലാണ് മനസാക്ഷി മരവിപ്പിക്കുന്ന സംഭവം നടന്നത്. പച്ചക്കറി വിൽപനക്കാരനായ പവൻകുമാറിന്‍റെ ഭാര്യയാണ് മരിച്ചത്.

​ശനിയാഴ്ച്ചയാണ് പവൻകുമാറിന്‍റെ ഭാര്യയുടെ ആരോഗ്യനില വഷളായത്. ആംബുലൻസ് വിളിക്കാൻ സഹായമഭ്യർഥിച്ച് ഇദ്ദേഹം അയൽവീടുകളിൽ കയറിയിറങ്ങിയെങ്കിലും ആരും തിരിഞ്ഞുനോക്കിയില്ല. 

തുടർന്ന് ഗത്യന്തരമില്ലാതെ, ഉപജീവനമാർഗമായ ഉന്തുവണ്ടിയിൽ ഭാര്യയെ കിടത്തി ആശുപത്രിയിലേക്ക് കൊണ്ടുപോവുകയായിരുന്നു. എന്നാൽ, ആശുപത്രിയിൽ എത്തുംമുമ്പ് മരണം സംഭവിച്ചു.

​ഉത്തർപ്രദേശ് സ്വദേശിയായ പവൻ കുമാർ 12 വർഷത്തോളമായി മധ്യപ്രദേശിലാണ് താമസം. ദീർഘകാലമായി അസുഖബാധിതയായിരുന്ന ഭാര്യയുടെ ചികിത്സയ്ക്കായി കുടുംബത്തിന്‍റെ സമ്പാദ്യം മുഴുവൻ ചെലവഴിച്ചിരുന്നു. കയ്യിൽ പണമില്ലാത്തതിനാലാണ് സ്വകാര്യ വാഹനം വിളിക്കാൻ സാധിക്കാതിരുന്നത്.

​അടിയന്തര സാഹചര്യങ്ങളിൽ എന്തുചെയ്യണമെന്നറിയാത്ത നിസ്സഹായാവസ്ഥയിലായിരുന്നു കുടുംബം. ആംബുലൻസ് ലഭിക്കാത്ത സാഹചര്യത്തെക്കുറിച്ച് അന്വേഷിക്കുമെന്ന് അധികൃതർ വ്യക്തമാക്കി.