1971 ന് ശേഷം ആദ്യം. ഡല്‍ഹി, ഉത്തര്‍പ്രദേശ്, പശ്ചിമ ബംഗാള്‍ ഉള്‍പ്പെടെയുള്ള സംസ്ഥാനങ്ങളിലെ 259 സ്ഥലങ്ങളില്‍ നാളെ രാജ്യവ്യാപകമായി സിവില്‍ ഡിഫന്‍സ് മോക്ക് ഡ്രില്‍

ഡല്‍ഹി: മെയ് 7 ന് ഡല്‍ഹി, ഉത്തര്‍പ്രദേശ്, പശ്ചിമ ബംഗാള്‍ ഉള്‍പ്പെടെയുള്ള സംസ്ഥാനങ്ങളില്‍ രാജ്യവ്യാപകമായി സിവില്‍ ഡിഫന്‍സ് മോക്ക് ഡ്രില്‍ നടത്തുമെന്ന് കേന്ദ്ര സര്‍ക്കാര്‍ പ്രഖ്യാപിച്ചു.

ഏപ്രില്‍ 22 ന് ജമ്മു കശ്മീരിലെ പഹല്‍ഗാമില്‍ 26 പേര്‍ കൊല്ലപ്പെട്ട ഭീകരാക്രമണത്തെത്തുടര്‍ന്ന് ഇന്ത്യയും പാകിസ്ഥാനും തമ്മിലുള്ള സംഘര്‍ഷം വര്‍ദ്ധിച്ച സാഹചര്യത്തിലാണ് നീക്കം.

നാളെ നടക്കുന്ന രാജ്യവ്യാപകമായ അഭ്യാസം മൂന്ന് വിഭാഗങ്ങളിലായി ആകെ 259 സ്ഥലങ്ങളിലായി നടക്കും.

യുദ്ധമുണ്ടായാല്‍ സ്വയം പ്രതിരോധത്തിനായി സജ്ജരാകാന്‍ ലക്ഷ്യമിട്ടുള്ള മോക്ക് ഡ്രില്ലുകളില്‍ സിവിലിയന്മാര്‍ പങ്കെടുക്കുന്നതിനാല്‍ മെയ് 7 ന് രാജ്യത്തിന്റെ വിവിധ ഭാഗങ്ങളില്‍ വ്യോമാക്രമണ സൈറണുകള്‍ മുഴങ്ങും.

1971 ന് ശേഷമുള്ള ഇത്തരത്തിലുള്ള ആദ്യ അഭ്യാസങ്ങളാണ് ഇവ.