അയോധ്യ രാമക്ഷേത്രത്തിന് ഭീഷണി. തമിഴ്‌നാട്ടിൽ നിന്നുമാണ് ഇമെയിൽ സന്ദേശമെത്തിയതെന്ന് പോലീസ് കണ്ടെത്തി. ക്ഷേത്രത്തിന്റെ സുരക്ഷ വർദ്ധിപ്പിക്കണമെന്ന ആവശ്യം ശക്തം

ഡൽഹി: ഉത്തർപ്രദേശിലെ അയോധ്യയിലെ രാമക്ഷേത്രത്തിന് ബോംബ് ഭീഷണി. ഇമെയിലൂടെയാണ് സുരക്ഷാ ഭീഷണിയുണ്ടെന്ന സന്ദേശം ലഭിച്ചത്. 

തിങ്കളാഴ്ച രാത്രിയാണ് രാമക്ഷേത്രം കൈകാര്യം ചെയ്യുന്ന ശ്രീരാമ ജന്മഭൂമി തീർത്ഥക്ഷേത്ര ട്രസ്റ്റിന് മുന്നറിയിപ്പ് ലഭിച്ചത്.  ഭീഷണി മെയിലിൽ ലഭിച്ചതിന്റെ പിന്നാലെ ക്ഷേത്രത്തിന്റെ സുരക്ഷ വർദ്ധിപ്പിക്കണമെന്ന ആവശ്യം ശക്തമായിട്ടുണ്ട്.

തമിഴ്‌നാട്ടിൽ നിന്നുമാണ് ഇമെയിൽ സന്ദേശമെത്തിയതെന്ന് പോലീസ് കണ്ടെത്തിയതായി വാർത്താ ഏജൻസിയായ പിടിഐ റിപ്പോർട്ട് ചെയ്തു.

ബരാബങ്കി, ചന്ദൗലി എന്നിവയുൾപ്പെടെ മറ്റ് പല ജില്ലകളിലേക്കും ഭീഷണി മെയിൽ ലഭിച്ചിട്ടുണ്ട്.

ഈ വിഷയത്തിൽ രാമക്ഷേത്ര ട്രസ്റ്റിന്റെ പരാതിയുടെ അടിസ്ഥാനത്തിൽ അയോധ്യ‍ പോലീസ് എഫ്‌ഐആർ ഫയൽ ചെയ്തു. സൈബർ സെൽ ഈ വിഷയം അന്വേഷിച്ച് വരികയാണ്. 

അതേസമയം, അയോധ്യയിലെ രാമക്ഷേത്രത്തിന് ചുറ്റും ഏകദേശം നാല് കിലോമീറ്റർ വിസ്തൃതിയിൽ സുരക്ഷാ മതിൽ പണിയുന്നുണ്ടെന്നും 18 മാസത്തിനുള്ളിൽ ഇത് പൂർത്തിയാകുമെന്നും ശ്രീരാമ ജന്മഭൂമി ക്ഷേത്ര നിർമ്മാണ സമിതി ചെയർപേഴ്‌സൺ നൃപേന്ദ്ര മിശ്ര വ്യക്തമാക്കി.