മഹാരാഷ്ട്രയിൽ നിർബന്ധിത ഭാഷ മറാത്തി മാത്രം: ദേവേന്ദ്ര ഫഡ്നാവിസ്

മുംബൈ: മഹാരാഷ്ട്രയില്‍ മറാത്തി നിര്‍ബന്ധിതഭാഷയായിരിക്കുമെന്നും മറ്റൊരു ഭാഷയും അടിച്ചേല്‍പ്പിക്കില്ലെന്നും മുഖ്യമന്ത്രി ദേവേന്ദ്ര ഫഡ്നാവിസ്.

സത്താറയില്‍ നടന്ന 99-ാമത് അഖില ഭാരതീയ മറാത്തി സാഹിത്യ സമ്മേളനത്തിന്റെ ഉദ്ഘാടന വേളയില്‍, ഫ്രഞ്ച്, സ്പാനിഷ് തുടങ്ങിയ വിദേശ ഭാഷകള്‍ക്ക് ചുവപ്പ് പരവതാനി വിരിക്കുമ്പോള്‍ മറ്റ് ഇന്ത്യന്‍ ഭാഷകളെ എതിര്‍ക്കുന്നത് തെറ്റാണെന്നും അദ്ദേഹം പറഞ്ഞു.

കഴിഞ്ഞ വര്‍ഷം, മഹാരാഷ്ട്രയിലെ സ്‌കൂളുകളില്‍ ഒന്നാം ക്ലാസ് മുതല്‍ ഹിന്ദി മൂന്നാം ഭാഷയായി അവതരിപ്പിക്കാനുള്ള തീരുമാനം ബിജെപി നേതൃത്വത്തിലുള്ള സര്‍ക്കാര്‍ പിന്‍വലിക്കുകയും, ഈ വിഷയം പരിശോധിക്കാന്‍ ഒരു കമ്മിറ്റി രൂപീകരിക്കുകയും ചെയ്തു.

ഭാഷാ നിര്‍ബന്ധിതമാക്കല്‍ എന്ന വിഷയം വ്യാപകമായി ചര്‍ച്ച ചെയ്യപ്പെടുന്നുണ്ടെന്ന് ഫഡ്നാവിസ് തന്റെ പ്രസംഗത്തില്‍ ചൂണ്ടിക്കാട്ടി.

'മുഖ്യമന്ത്രി എന്ന നിലയില്‍, മഹാരാഷ്ട്രയില്‍ മറാത്തി മാത്രമേ നിര്‍ബന്ധമുള്ളൂ എന്ന് ഞാന്‍ വ്യക്തമായി പറയാന്‍ ആഗ്രഹിക്കുന്നു. മറ്റൊരു ഭാഷയും നിര്‍ബന്ധമല്ല. ത്രിഭാഷാ ഫോര്‍മുലയെക്കുറിച്ച് വ്യത്യസ്ത അഭിപ്രായങ്ങളുണ്ടായിരുന്നു. വിദ്യാര്‍ത്ഥികള്‍ക്ക് ഇഷ്ടമുള്ള ഏത് ഇന്ത്യന്‍ ഭാഷയും പഠിക്കാനുള്ള സ്വാതന്ത്ര്യമുണ്ട്. മൂന്നാം ഭാഷ ഏത് നിലവാരത്തില്‍ നിന്നാണ് അവതരിപ്പിക്കേണ്ടത് എന്നതായിരുന്നു ഒരേയൊരു ചോദ്യം,' അദ്ദേഹം പറഞ്ഞു.