ഇന്ത്യയിലെ ഏറ്റവും വലിയ ഡിജിറ്റൽ അറസ്റ്റ് തട്ടിപ്പ്: മുംബൈയിലെ ബിസിനസുകാരന് നഷ്ടപ്പെട്ടത്  58 കോടി രൂപ

മുംബൈ: എൻഫോഴ്‌സ്‌മെന്റ് ഡയറക്ടറേറ്റിന്റെയും സിബിഐയുടെയും ഉദ്യോഗസ്ഥരായി ചമഞ്ഞ്  നടത്തിയ 'ഡിജിറ്റൽ അറസ്റ്റ്' തട്ടിപ്പിൽ മുംബൈയിലെ 72 കാരനായ ബിസിനസുകാരന്  നഷ്ടമായത് 58 കോടി രൂപ. 

ഇന്ത്യയിൽ ഇതുവരെ റിപ്പോർട്ട് ചെയ്ത 'ഡിജിറ്റൽ അറസ്റ്റ്' സൈബർ തട്ടിപ്പ് കേസിൽ ഏറ്റവും വലുതാണ് കഴിഞ്ഞ മുംബൈയിലുണ്ടായതെന്ന് അന്വേഷണ ഉദ്യോ​ഗസ്ഥർ വെളിപ്പെടുത്തി. 

കേസുമായി ബന്ധപ്പെട്ട് മഹാരാഷ്ട്ര സൈബർ വിഭാഗം മൂന്ന് പേരെ അറസ്റ്റ് ചെയ്തിട്ടുണ്ട്. 

എൻഫോഴ്‌സ്‌മെന്റ് ഡയറക്ടറേറ്റിലെയും സെൻട്രൽ ബ്യൂറോ ഓഫ് ഇൻവെസ്റ്റിഗേഷനിലെയും ഉദ്യോഗസ്ഥരായി ചമഞ്ഞ തട്ടിപ്പുകാർ ഓഗസ്റ്റ് 19 നും ഒക്ടോബർ 8 നും ഇടയിൽ ബിസിനസുകാരനെ ബന്ധപ്പെടുകയും കള്ളപ്പണം വെളുപ്പിക്കൽ കേസിൽ തന്റെ പേര് ഉയർന്നുവന്നിട്ടുണ്ടെന്ന് അവകാശപ്പെടുകയും ചെയ്തു.

വീഡിയോ കോൾ ചെയ്ത ശേഷം ബിസിനസുകാരനെയും ഭാര്യയെയും "ഡിജിറ്റൽ അറസ്റ്റിൽ" ആക്കുകയും, തട്ടിപ്പുകാർ നൽകിയ ബാങ്ക് അക്കൗണ്ടുകളിലേക്ക് പണം നിക്ഷേപിക്കാൻ ആവശ്യപ്പെടുകയുമായിരുന്നു. 

രണ്ട് മാസത്തിനുള്ളിൽ ഇര ആർ‌ടി‌ജി‌എസ് വഴി 58 കോടി രൂപ ഒന്നിലധികം ബാങ്ക് അക്കൗണ്ടുകളിലേക്ക് ട്രാൻസ്ഫർ ചെയ്തതായി ഉദ്യോഗസ്ഥർ പറഞ്ഞു.

പിന്നീട് താൻ വഞ്ചിക്കപ്പെട്ടുവെന്ന് മനസ്സിലാക്കിയ അദ്ദേഹം പരാതിയുമായി സൈബർ പോലീസിനെ സമീപിക്കുകയായിരുന്നു. 

ഭാരതീയ ന്യായ സംഹിത, ഇൻഫർമേഷൻ ടെക്നോളജി ആക്ട് എന്നിവയിലെ പ്രസക്തമായ വ്യവസ്ഥകൾ പ്രകാരം സൈബർ ഉദ്യോഗസ്ഥർ കഴിഞ്ഞ ആഴ്ച കേസ് രജിസ്റ്റർ ചെയ്തു.

അന്വേഷണത്തിനിടെ, 18 ബാങ്ക് അക്കൗണ്ടുകളിലേക്ക് തട്ടിപ്പുകാർ പണം കൈമാറ്റം ചെയ്യപ്പെട്ടതായി കണ്ടെത്തിയതായി ഉദ്യോഗസ്ഥർ പറഞ്ഞു.

തട്ടിപ്പിൽ ഉൾപ്പെട്ട മൂന്ന് പേരെ പോലീസ് തിരിച്ചറിഞ്ഞിട്ടുണ്ട് - മലാഡിന്റെ പ്രാന്തപ്രദേശത്തുള്ള അബ്ദുൾ ഖുള്ളി (47), മുംബൈ സെൻട്രലിൽ നിന്നുള്ള അർജുൻ കട്വാസര (55), സഹോദരൻ ജെതാറാം (35) എന്നിവരെ അറസ്റ്റ് ചെയ്തതായി ഉദ്യോഗസ്ഥർ പറഞ്ഞു.