ഇതാണ് സംഘടനയുടെ ശക്തി...' മോദിയുടെ പഴയ ഫോട്ടോ എക്‌സിൽ പങ്കിട്ട് ദിഗ്‌വിജയ സിംഗ്

ഡല്‍ഹി: വിവാദത്തിന് തിരികൊളുത്തി മുതിര്‍ന്ന കോണ്‍ഗ്രസ് നേതാവ് ദിഗ്വിജയ് സിംഗ്. മുതിര്‍ന്ന നേതാക്കളുടെ കാല്‍ക്കല്‍ തറയില്‍ ഇരിക്കുന്ന പ്രധാനമന്ത്രി നരേന്ദ്ര മോദിയുടെ പഴയ ഫോട്ടോ അദ്ദേഹം സോഷ്യല്‍ മീഡിയയില്‍ പങ്കുവെച്ചു. 

ഈ ചിത്രത്തോടൊപ്പം ദിഗ്വിജയ് സിംഗ് എഴുതി, 'ഈ ചിത്രം ഞാന്‍ ക്വോറ സൈറ്റില്‍ നിന്നാണ് കണ്ടെത്തിയത്. ഇത് വളരെ ശ്രദ്ധേയമാണ്.

ആര്‍എസ്എസിന്റെ ഒരു താഴേത്തട്ടിലുള്ള വളണ്ടിയറും ജനസംഘത്തിന്റെ @BJP4India പ്രവര്‍ത്തകനുമായ ഒരാള്‍ എങ്ങനെയാണ് നേതാക്കളുടെ കാല്‍ക്കല്‍ തറയില്‍ ഇരുന്നുകൊണ്ട് സംസ്ഥാനത്തിന്റെ മുഖ്യമന്ത്രിയും രാജ്യത്തിന്റെ പ്രധാനമന്ത്രിയും ആയത്. ഇതാണ് സംഘടനയുടെ ശക്തി. ജയ് സിയ റാം.'

പോസ്റ്റ് പുറത്തുവന്നയുടനെ ഇത് വലിയ രീതിയില്‍ ചര്‍ച്ചയായി. ചിലര്‍ ഇതിനെ പ്രധാനമന്ത്രിയെ പരിഹസിച്ച രീതിയിലാണ് കണക്കാക്കിയത്. മറ്റുള്ളവര്‍ ഇതിനെ സംഘടനാ രാഷ്ട്രീയത്തെക്കുറിച്ചുള്ള ഒരു വ്യാഖ്യാനമായി കരുതി.

ഒരു തരത്തിലും വിമര്‍ശിക്കാന്‍ താന്‍ ഉദ്ദേശിച്ചിട്ടില്ലെന്ന് ദിഗ്വിജയ് സിംഗ് പിന്നീട് ഒരു മാധ്യമത്തിന് നല്‍കിയ അഭിമുഖത്തില്‍ വ്യക്തമാക്കി. ആര്‍എസ്എസിന്റെയും ബിജെപിയുടെയും സംഘടനാ ഘടനയുടെ ശക്തി പ്രകടിപ്പിക്കുന്നതിനാണ് ഈ പോസ്റ്റ് ഉദ്ദേശിച്ചതെന്ന് അദ്ദേഹം പറഞ്ഞു.