'ഓപ്പറേഷൻ സിന്ദൂരിനിടെ ദിവസങ്ങൾക്കുള്ളിൽ പാകിസ്ഥാൻ മുട്ടുകുത്തി'. ഐഎൻഎസ് വിക്രാന്തിൽ ദീപാവലി ആഘോഷിച്ച് പ്രധാനമന്ത്രി മോദി

ഗോവ: ഇന്ത്യന്‍ സായുധ സേനാംഗങ്ങള്‍ക്കൊപ്പം ദീപാവലി ആഘോഷിച്ച് പ്രധാനമന്ത്രി നരേന്ദ്ര മോദി. തിങ്കളാഴ്ച ഗോവ, കാര്‍വാര്‍ തീരത്തുള്ള ഐഎന്‍എസ് വിക്രാന്തില്‍ ഇന്ത്യന്‍ നാവിക സേനാംഗങ്ങള്‍ക്കൊപ്പം മോദി ദീപാവലി ആഘോഷിച്ചു.

സന്ദര്‍ശന വേളയില്‍ പ്രധാനമന്ത്രി മോദി ഇന്ത്യന്‍ നാവിക സേനാംഗങ്ങളെ അഭിസംബോധന ചെയ്തുകൊണ്ട് ഐഎന്‍എസ് വിക്രാന്ത് ഇന്ത്യന്‍ സേനയുടെ യഥാര്‍ത്ഥ കഴിവുകളെ പ്രതിഫലിപ്പിക്കുന്നുവെന്നും ഓപ്പറേഷന്‍ സിന്ദൂരിനിടെ ദിവസങ്ങള്‍ക്കുള്ളില്‍ പാകിസ്ഥാനെ മുട്ടുകുത്തിച്ചുവെന്നും പറഞ്ഞു.

ഓപ്പറേഷന്‍ സിന്ദൂരില്‍ പാകിസ്ഥാന്റെ കീഴടങ്ങലില്‍ നിര്‍ണായക പങ്ക് വഹിച്ച മൂന്ന് സേനകള്‍ തമ്മിലുള്ള 'അസാധാരണമായ ഏകോപന'ത്തെയും അദ്ദേഹം പ്രശംസിച്ചു.

ഐഎന്‍എസ് വിക്രാന്ത് വെറുമൊരു യുദ്ധക്കപ്പല്‍ മാത്രമല്ല, ഇന്ത്യയുടെ 'കഠിനാധ്വാനം, കഴിവ്, സ്വാധീനം, പ്രതിബദ്ധത' എന്നിവയുടെ സാക്ഷ്യമാണെന്നും അദ്ദേഹം പറഞ്ഞു. 

'ഐഎന്‍എസ് വിക്രാന്തില്‍ ഇന്നലെ ചെലവഴിച്ച രാത്രി വാക്കുകളില്‍ വിവരിക്കാന്‍ പ്രയാസമാണ്. നിങ്ങളെല്ലാവരും നിറഞ്ഞുനിന്ന അപാരമായ ഊര്‍ജ്ജവും ഉത്സാഹവും ഞാന്‍ കണ്ടു.

'ഇന്നലെ നിങ്ങള്‍ ദേശസ്‌നേഹ ഗാനങ്ങള്‍ ആലപിക്കുന്നത് ഞാന്‍ കണ്ടപ്പോള്‍, നിങ്ങളുടെ ഗാനങ്ങളില്‍ ഓപ്പറേഷന്‍ സിന്ദൂരിനെ വിവരിച്ച രീതി കണ്ടപ്പോള്‍, ഒരു ജവാന് യുദ്ധക്കളത്തില്‍ നില്‍ക്കുമ്പോള്‍ അനുഭവപ്പെടുന്ന അനുഭവം ഒരു വാക്കുകളിലും പൂര്‍ണ്ണമായി വിവരിക്കാന്‍ കഴിയില്ല.'ഞായറാഴ്ച ഐഎന്‍എസ് വിക്രാന്തില്‍ എത്തിയ പ്രധാനമന്ത്രി മോദി പറഞ്ഞു.