കുരയ്ക്കുന്ന നായയെച്ചൊല്ലി തര്‍ക്കം. യുവാവിനെ വെടിവച്ചു കൊന്നു

ഫതുഹ: നായ കുരയ്ക്കുന്നതിനെച്ചൊല്ലിയുണ്ടായ തര്‍ക്കത്തെത്തുടര്‍ന്ന് ഒരു യുവാവ് വെടിയേറ്റ് മരിച്ചു. 30 വയസ്സുള്ള ധീരജ് കുമാറാണ് മരിച്ചത്.

സംഭവസമയത്ത്, ധീരജിന്റെ നായ അയല്‍വാസിയായ പപ്പു കുമാറിനെ നോക്കി കുരച്ചു, ഇത് ഇരുവരും തമ്മില്‍ സംഘര്‍ഷത്തിലേക്ക് നയിച്ചു. വഴക്കിനിടെ, പപ്പു തന്റെ കൈവശമുണ്ടായിരുന്ന പിസ്റ്റള്‍ ഉപയോഗിച്ച് ധീരജിനെ വെടിവച്ചു.

വെടിയൊച്ച കേട്ട് ഗ്രാമവാസികള്‍ ഒത്തുകൂടി പപ്പുവിനെ ക്രൂരമായി മര്‍ദ്ദിച്ചു, രക്തം വാര്‍ന്ന് അബോധാവസ്ഥയിലായി. പരിക്കേറ്റ ഇരുവരെയും ഫത്തുഹ പോലീസ് സര്‍ക്കാര്‍ ആശുപത്രിയില്‍ എത്തിച്ചെങ്കിലും ധീരജ് മരിച്ചതായി ഡോക്ടര്‍മാര്‍ പ്രഖ്യാപിച്ചു.

അതേസമയം, ഗുരുതരമായി പരിക്കേറ്റ പപ്പുവിനെ പ്രഥമശുശ്രൂഷയ്ക്ക് ശേഷം പട്‌നയിലേക്ക് അയച്ചു. ആംബുലന്‍സില്‍ പപ്പുവിനെ പട്‌നയിലേക്ക് അയയ്ക്കാനുള്ള ഒരുക്കങ്ങള്‍ നടക്കുമ്പോള്‍, മരിച്ചയാളുടെ ബന്ധുക്കള്‍ തടയാന്‍ ശ്രമിച്ചു. ഇത് ആശുപത്രി പരിസരത്ത് ബഹളത്തിന് കാരണമായി.

സ്ഥലത്തുണ്ടായിരുന്ന ദീപക് കുമാറും ഫതുഹ ഡിഎസ്പി അവധേഷ് കുമാറും കുടുംബാംഗങ്ങളെ അനുനയിപ്പിക്കാന്‍ ശ്രമിച്ചെങ്കിലും അവര്‍ വഴങ്ങിയില്ല. ആംബുലന്‍സും പോലീസ് വാഹനവും തടയാന്‍ കുടുംബാംഗങ്ങള്‍ ആവര്‍ത്തിച്ച് ശ്രമിച്ചത് സംഘര്‍ഷാവസ്ഥയിലേക്ക് നയിച്ചു.

പോലീസ് ഇടപെട്ട് പരിക്കേറ്റ പപ്പുവിനെ മെച്ചപ്പെട്ട ചികിത്സയ്ക്കായി പട്‌നയിലേക്ക് അയച്ചു. അതേസമയം, ധീരജിന്റെ കുടുംബം അദ്ദേഹത്തിന്റെ മൃതദേഹം ആശുപത്രിയില്‍ നിന്ന് ബലമായി ഗ്രാമത്തിലേക്ക് കൊണ്ടുപോയി.